
१५ चैत २०८१ मा राजावादी भनौदाहरूले भाटभटेनीमाथि धावा बोले र तोडफोड गरे । भाटभटेनीको सम्पत्ति लुट्ने काम गरे । यो निकै खेदपूर्ण छ । मैले आफू हाइस्कुलमा पढ्दादे्खि नै राजनीति सम्बन्धी थोरै ज्ञान राख्थेँ । त्यसताका पञ्चायतको साशन थियो । पञ्चायती साशनमा बोल्ने अधिकार थिएन ।
मैले आफ्नो विद्यार्थी कालमा पञ्चायतविरुद्ध संघर्ष पनि गरेको हो । यो कुरा भनिराख्दा मलाई गर्व लाग्छ । अहिले आएर म व्यवसायी भएँ । म बर्बरता विरुद्ध लड्ने एक शाहसी युवा पनि हुँ । म नेपाली भएको नाताले अन्याय विरुद्ध लड्नुपर्छ । मैल १६–१७ वर्षको उमेरदेखि लडाइँ लड्दै आएको हो ।
विगतदेखि नै मैले विभिन्न घटना परिघटना देख्दै आएको हो । कुनै पनि घटनामा यसरी व्यक्तिको सम्पत्तिमाथि धावा बोल्ने, आक्रमण गर्ने, व्यक्तिका घरमा ढुंगामुढा गर्ने, अफिसमा आगजनी गर्ने काम भएको थिएन । यो मात्रै होइन, एक फोटो पत्रकार जसले समाज सुसूचित गर्न आफ्नो काम गरिरहेका थिए उनै व्यक्तिलाई जलाएर मारिदिने यस्तो बर्बर आन्दोलन कहिल्यै पनि देखिनँ ।
मलाई यो कुरा भनिरहँदा कुनै आफ्ठ्यारो लाग्दैन । आज भाटभटेनीमाथि आक्रमण भयो । भोलि अन्य प्रतिष्ठानहरूमा पनि आक्रमण हुन सक्छ । आज भाटभटेनीको सम्पत्ति लुटे भोलि देशको सबै व्यवसायीको सम्पत्ति लुट्न सक्छन् । यस्ता लुटेराहरूले ल्याएको परिवर्तन हामीलाई चाहिएको हो ? यस्ता समूहप्रति हाम्रो समर्थन हो ? कदापि होइन । हामी यो देशलाई सम्पन्न बनाउन चाहन्छौं । यो देश विश्वको सम्पन्न मुलुकमा परोस् भनने चाहना राख्छौं । तर, सत्ता प्राप्तिका लागि जुन कुरा भयो, यो एकदमै खेदपूर्ण छ ।
आज व्यावसायिक प्रतिष्ठान र मिडिया हाउसमा आक्रमण भयो । हामीसँग पनि हात छ । दुर्गा प्रसाईं जस्तो राजावादी आन्दोलनको लिडर, मेन नायक, कमान्डर उसको बीएन्डसी अस्पतालमा गएर ढुंगा हान्यौं भने के हुन्छ ? लुटपाट गरे के हुन्छ ? दुर्गा प्रसाईंको मन दुख्दैन ? यसो गर्दा मीनबहादुर, भाटभटेनी र भाटभटेनी सम्बद्ध सबै परिवारको मन दुखेको छ ।
आज कुनै पूर्व प्रधानमन्त्रीको घरमा अथवा आन्दोलनको मेन नाइकेको दरबारमा दुंगामुढा गरे के हुन्छ ? नेपाली जनताले यत्रो संघर्ष गरेर ल्याएको गणतन्त्रमाथिको आक्रमण ज्यादै खेदपूर्ण छ । म नेपालको सचेत नागरिक हुँ । सचेत नागरिक भएको हैसियतले म सरकारलाई प्रश्न गर्छु– एउटा गुन्डालाई जे पनि भन्न र गर्न दिने ? यो भनिरहँदा मलाई कुनै त्रास, डर र हिनताबोध छैन ।
राज्यले व्यवसायीलाई तथानाम गाली गर्दा, बैंकको पैसा नतिर भन्दा उसलाई छुट दियो । बैंकको कर्मचारीलाई मोसो दल्दा छुट दियो । यसैको परिणाम हो यी दुई जना युवाको हत्या । यस घटनामा दोषीलाई कडाभन्दा कडा कारबाही गर्न म राज्यलाई आग्रह गर्छु । एउटा गुन्डाले देशमा सरकारी र निजी सम्पत्तिमाथि धावा बोलेको छ । यसमा म सरकारलाई कडाभन्दा कडा कारबाही गर्न अनुरोध गर्छु ।
हामी आफूले आर्जन गरेको समपत्तिबाट ट्याक्स (कर) तिर्छौं । हाम्रो ट्याक्सबाट सरकारले सुरक्षामा खर्च गर्छ । तर, हामीलाई सुरक्षा खोइ ? हाम्रा दसौं हजार भाइबहिनीको सुरक्षा खोइ ? दुलप्रसाद पराजुलीले मात्रै गरेर सुरक्षा हुन्छ ? यो त राज्यको दायित्वभित्रको कुरा हो । दुर्गा प्रसाईं गुन्डा नाइके हो । राज्यले पुल्पुल्याउँदा आज यो परिणाम देखियो ।
दुर्गा प्रसाईं मारवाडीले यस्तो गर्यो, त्यस्तो गर्यो भन्दै हिँडेका छन् । मारवाडी देशको नागरिक होइन ? मारवाडी भगाउने ? देश कंगाल बनाउने ? व्यवसायी भगाउने ? गुन्डा नाइके दुर्गा प्रसाईंको क्रियाले राजसंस्था फर्किँदैन, म ठोकुवा गरेर भन्छु । भाटभटेनीलाई लुटपाट गरेर राजसंस्था फर्किन्छ ? भाटभटेनीमा ढुंगा हानेर नेपालको संविधान मेटिन्छ ? हामी बुझ्दैनौं ? यो सबै डकैती हो ।
(भाटभटेनी सुपर स्टोर सञ्चालक गुरुङले बुधबार कोटेश्वर भाटभटेनीमा आयोजित कार्यक्रममा व्यक्त गरेको विचारको सम्पादित अंश)
प्रतिक्रिया 4