अञ्जिला, लाज शरणम्, होस्टेल ३ ले अहिलेसम्म कति कमाए ?

काठमाडौं । तपाईं घरेलु फिल्मको बक्सअफिसलाई पछ्याउनुहुन्छ भने खासगरी ‘कन्टेन्ट’मा आधारित फिल्मले उत्साहजनक कमाइ गरिरहेका छन् । स्टार र चलेका ब्यानर हैन, दर्शकले नयाँ अनुहार र सीमान्त कथालाई रुचाएको देखिन्छ ।

यसको उदाहरण दशैंपछिको बक्सअफिसमा देखिएको छ । जसरी ‘अञ्जिला’ले आफूलाई सुपरहिट फिल्मको रुपमा उभ्याएको छ, यसले जीवन र संघर्षका कथा बनाउने निर्मातालाई प्रेरित गरेको छ । यो फिल्मको कमाइ अझै केही सप्ताहन्तसम्म रोकिने छाँटकाँट छैन ।

मिलन चाम्स निर्देशित फिल्मले २० दिनसम्म (फागुन २९ मा रिलिज भएको)ले मंगलबारसम्म देशव्यापी ६ करोड ४५ लाख ग्रस कमाएको सञ्चार तथा सूचना प्रविधि मन्त्रालयअन्तर्गतको बक्सअफिसमा उल्लेख छ ।

नयाँ अनुहार र डेब्यु निर्देशकको फिल्म ‘होस्टेल ३’ पनि अर्को उत्साहजनक कमाइ गर्ने फिल्म हो । यो फिल्मले प्रदर्शनको २६ दिन मंगलबारसम्म (फागुन २३ मा रिलिज भएको) देशव्यापी ४ करोड ४ लाख रुपैयाँ कमाएको छ । यो फिल्ममा लगभग सबै नयाँ अनुहार छन् जो सामाजिक सञ्जालमा हिट भइसकेका थिए ।

कुमार कट्टेल निर्देशित फिल्म ‘लाज शरणम्’ सुखद कमाइ गर्ने फिल्ममध्ये पर्छ । यो फिल्मको कमाइ अपेक्षित होइन, निराशाजनक पनि होइन । फागुन १४ गते रिलिज भएको यो फिल्मले प्रदर्शनको ३५ दिन मंगलबारसम्म देशव्यापी ४ करोड २२ लाख रुपैयाँ ग्रस कमाइ गरेको मन्त्रालयको बक्सअफिसमा उल्लेख छ । यी तीनैवटा फिल्म अहिले पनि प्रदर्शनरत छन् ।