पूर्वमन्त्री तथा भाजपा नेतृ स्मृति इरानी टिभी सिरियलमा फर्किने

एकता कपूरसँग स्मृति इरानी (दायाँ) ।

मुम्बई । एकता कपूर भारतीय टेलिभिजनको विषयवस्तुमा क्रान्तिकारी परिवर्तन ल्याउने कार्यका लागि परिचित छिन् । दुई टिभी शो ‘क्यूँकी सास भी कभी बहू थी’ र ‘कहानी घर घर की’ले उनलाई घरघरमा परिचत तुल्यायो ।

सप्ताहन्तभर गृहिणी उनका सिरियलको पर्खाइमा हुन्थे । त्यो सिरियलको ‘ब्याकग्राउण्ड स्कोर’ प्रत्येक भारतीय घर-घरको राष्ट्रिय गानजस्तै बन्थ्यो । यतिबेला उनै एकता दर्शकलाई त्यो ‘नोस्टाल्जिक मोमेन्ट’लाई ताजा तुल्याउने कार्यमा लागिपरेकी छन् ।

क्लासिक टेलिभिजन कार्यक्रम ‘क्यूँकी सास भी कभी बहू थी’ (२०००-२००८) यसको मूल कलाकार अमर उपाध्याय र स्मृति इरानीलाई लिएर दर्शकमाझ फर्किदैंछ । उपाध्यायले मिहिरको रुपमा छोटो भूमिका र इरानीले तुलसी विरानीको रोलमा पुनरागमन गर्न लागेको पिंकभिल्लाले उल्लेख गरेको छ ।

आठवर्षसम्म चलेको शोको क्लाइमेक्स एपिसोड सन् २००८ को सेप्टेम्बरमा प्रसारण भएको थियो । सीमितरुपमा तयार पार्न लागिएको यो शोको निर्माणको तयारी चलिरहेको छ । एकताले यो शोको समाचारलाई गोप्य राख्ने प्रयास गरिरहेकी छन् ।

यसका साथै, पूर्वमहिला तथा बाल विकासमन्त्री समेत रहेकी इरानीले आफ्नो पात्र तुलसी विरानीलाई चित्रणको लागि मिहेनत गरिरहेकी छन् । श्रृंखलाको सुरुवाती दृश्य उस्तै छ जहाँ तुलसीले सिरियलका हरेक पात्रलाई परिचय गराएर दर्शकलाई घरमा स्वागत गर्छिन् । यो दृश्य मूल दृश्य छायांकन गरिएको स्थानमा नै छायांकन गरिने भएको छ ।

कपूर र टोलीले जुन २०२५ मा आधिकारिक रूपमा यो समाचार घोषणा गर्ने योजना बनाइरहेका छन् ।