ज्ञानेन्द्र र दुर्गाको बराबरका तस्वीर देखेपछि फरक्क फर्किएँ : राप्रपा सांसद तामाङ

२० चैत, काठमाडौं । राष्ट्रिय प्रजातन्त्र पार्टी (राप्रपा) का सांसद बुद्धिमान तामाङले गत चैत १५ मा काठमाडौंको तीनकुनेमा भएको प्रदर्शनबारे संसदीय समितिमा ब्रिफिङ गरेका छन् ।

उनले उक्त प्रदर्शनमा सहभागी हुन आफू पनि पुगेको भए पनि तत्काल फर्किएको बुधबार राज्य, व्यवस्था तथा सुशासन समितिको बैठकलाई जानकारी गराए ।

सोही प्रदर्शनका कमाण्डरसमेत रहेका विवादित मेडिकल व्यवसायी दुर्गा प्रसाईंको तस्वीर पूर्वराजासँगै जोडेर राखेको देखेपछि आफू त्यहाँबाट फर्किएको तामाङले बताएका छन् ।

‘त्यो दिन म पनि गएको थिएँ । सरर यसो हेरेँ, हेर्दै जाँदा मञ्चतिर यसो हेर्दा राजाको फोटो, उही बराबरको दुर्गा प्रसाईंको फोटो मञ्चमा देखेँ,’ उनले बैठकमा भने, ‘ओखो यो त खत्तम रैछ भनेर म फरक्क फर्किएँ ।’

त्यसपछि आफू सिनामंगलतिर लागेको उनले बताए । त्यतिबेला केही मान्छेहरू प्रदर्शनस्थलतर्फ फर्किएको बताए ।

‘मैले सिनामंगलमा हुल भेटेँ । उता, अश्रुग्यास पड्किहाल्यो । सुरु हुँदाहुँदै मञ्चमा अश्रुग्यास हानिदियो,’ उनले भने ।

उनले बोल्दाबोल्दै पछाडीबाट एक सांसदले प्रश्न गरे, ‘त्यो तस्वीरमै हान्यो ?’

जवाफमा तामाङले भनेका छन्, ‘अँ त्यहीँ हानिदियो । अन्त पनि एक दुई ठाउँ हान्यो । अनि त्यहाँ हान्यो ।’

उनले उक्त घटनाबारे आफ्ना कुरा माथि पार्नेगरी मात्रै बोल्न नहुने भनाइ राखे ।

‘हामीले इमानदार कुरा गर्नुपर्छ हेर्नुस् । आफ्नो कुरा माथि पर्नलाई भन्न हुँदैन । यसमा जाँच हुनुपर्छ भन्ने मेरो कुरा छ,’ तामाङले भने ।

तामाङले उक्त दिनको घटनाबारे सत्यतथ्य छानबिन हुनुपर्ने बताए ।

‘यो सत्यतथ्य हुनुपर्‍यो । हाम्रो वरिष्ठ उपाध्यक्ष र माननीय महामन्त्रीज्यू थुनामा हुनुहुन्छ,’ तामाङले भने, ‘उहाँलाई नेपालको भए भरको सबै कानुन लगाइरहेको छ । उहाँको हो कि होइन त भन्नुपर्‍यो नि त । उहाँले त्यो गरेको त छैन । फस्यो त फस्यो । गएर फस्यो । तर जाँच हुनुपर्छ । हेर्नुस्, भोलि आफूलाई पनि पर्नसक्छ । न्यायिक जाँच किन सरकारले गर्दैन ?’

उनले आफूहरूको पनि उक्त घटनाका विषयमा केही गल्ती भएको स्वीकार गरेका छन् ।

‘हाम्रो पनि केही गल्ती भयो । जसले पनि कार्यक्रम गर्छ भने त्यसलाई समर्थन गर्न नहुने रहेछ । म त सभामा पुगेँ, टाप कसिहालेँ,’ उनले भने, ‘मलाई त फोटो देखेर नै डर लाग्यो । उहाँको ब्याकग्राउन्ड बुझिरहेको मान्छे त्यो देख्नेबित्तिकै डर लाग्यो । एकतर्फी नहोस् न्यायिक छानबिन हुनुपर्छ ।’