एनपीएल आयोजनामा अनियमितता भएको विषयमा छानविन गर्न समित गठन

२० चैत, काठमाडौं । नेपाल प्रिमियर लिग (एनपीएल) आयोजनाको क्रममा विभिन्न क्षत्रेमा अनियमितता भएको भन्दै छानविन गर्नका लागि राष्ट्रिय खेलकुद परिषद (राखेप)ले बोर्ड सदस्य अञ्जन धमलाको संयोजकत्वमा तीन सदस्यीय कार्यदल गठन गरेको छ ।

मंसिर १५ देखि पुष ६ गतेसम्म टीयू मैदानमा भएको एनपीएल आयोजनाका क्रममा राष्ट्रिय खेलकुद विकास ऐन तथा विज्ञापन नियमन ऐन र अन्य प्रचलित कानूनहरुको उल्लंघन गर्दै अनियमितता गरेको आरोपमा आयोजक नेपाल क्रिकेट संघ (क्यान)माथि छानविनका लागि उक्त कार्यदल गठन गरिएको हो ।

युवा तथा खलेकुद मन्त्रालयको निर्देशनअनुसार राखेपले सदस्यसचिवस्तरीय निर्णयबाट चैत १३ गते धमलाको संयोजकत्वमा तीन सदस्यीय कार्यदल गठन गरेको थियो । समितिको सदस्यमा परिषदको प्रशासन विभागका प्रशासकिय अधिकृत कमल दाहाल र परिषद कर्मचारी प्रशासन शाखाका प्रशासकिय अधिकृत सारंगीन निरौला छन् ।

उक्त कार्यदललाई १५ दिनभित्र छानविन गरि प्रतिवेदन बुझाउने म्यान्डेटसहित दिइएको छ ।

एनपीएलको पहिलो संस्करणमा क्यानले विश्व चर्चित भारतीय टेलिभिजन स्टार स्पोर्ट्सलाई ब्रोडकास्टिङ पार्टनरको रुपमा अनुबन्ध गर्दै सबै खेल प्रत्यक्ष प्रशारण गरेको थियो र त्यस वापत क्यानले नै स्टार स्पोर्टसलाई करोडौं रुपैयाँ तिरेको थियो ।

क्यानले ‘सार्वजनिक खरिद ऐनविपरित हुने गरि भ्रामक सुचना जारी गर्दै नेपाली मिडिया तथा विञापन उद्योगको स्रोत र क्षमताको अवमुल्यन गरेको, प्रचलित अन्य कानूनहरुको अलावा विज्ञापन नियमन गर्ने ऐन, २०७६ को दफा ६ को उल्लंघन गरेको, नेपालमा विज्ञापन व्यावसाय गर्नका लागि विज्ञापन बोर्डमा दर्ता हुन विदेशी टेलिभिजन च्यानलको सदस्यता लिनुपर्ने बाध्यात्मक परिस्थिती सिर्जना गरेको, राष्ट्रिय खेलकुद विकास ऐन, २०७७ को दफा ४४ को उपदफा २ बमोजिम राष्ट्रिय खेल संघ वा प्रदेश र स्थानीय स्तरका खेलसम्बन्धि संस्था वा निकाय तथा संघले विदेशी सरकार, अन्तर्राष्ट्रिय रुपमा प्रतिष्ठा कमाएका अन्य अन्तर्राष्ट्रिय च्यानललाई मौका नदिई सार्वजनिक खरिद ऐन विपरित विना टेण्डर स्टार स्पोर्टसलाई दिएको’ भन्ने उजुरी परिषद र युवा तथा खेलकुद मन्त्रालयसँगै अख्तियार दुरुपयोग अनुसन्धान आयोगमा पनि परेको थियो ।

सोही उजुरीको आधारमा अख्तियारले युवा तथा खेलकुख मन्त्रालय तथा मन्त्रालयले परिषदलाई छानविन गरि सत्यतथ्यको प्रतिवेदन बुझाउन निर्देशन दिएका थिए ।

मन्त्रालयले फागुन १ गते यस विषयमा छानविन गरि मन्त्रालयमा प्रतिवेदन पेश गर्न राखेपलाई निर्देशन दिएको थियो ।

राखेपको खेलकुद विकास विभागकी निमित्त विभागीय प्रमूख प्रभा कर्माचार्यले कार्यदलका संयोजक धमला तथा सदस्यहरुलाई चैत १७ गते कार्यक्षेत्र र समयसिमा तोक्दै पत्र दिएकी थिइन । कार्यदलका संयोजक र सदस्यहरुले पत्र बुझेको मितिले १५ दिनभित्र छानविन गरेर प्रतिवेदन बुझाइसक्नुपर्नेछ ।

कार्यदललाई उजुरीको विषयसँग सम्बनिधत आवश्यक कागजात अध्ययन गर्ने, सरोकारवाला सबै पक्षसँग छलफल गर्ने र प्रचलित कानुनको आधारमा प्रतिवेदन तयार गर्ने गर्ने कार्यक्षेत्र तोकिएको छ । तोकिएको समयभित्र छानविनको प्रतिवेदन पेश गर्न समेत भनिएको छ ।

एनपीएल आयोजनाका क्रममा नेपाली सञ्चामाध्यमलाई वेवास्ता गर्दै करौडौं रकम तिरेर स्टार स्पोर्ट्सलाई प्रत्यक्ष प्रशारढ गर्न दिइएको, नेपालको कानुनविपरित बेटिङ कम्पनीहरुलाई प्रायोजकका रुपमा स्थान दिइएको जस्तो विषयमा क्यानको ठूलो आलोचना भएको थियो ।

यस्तै नेपालको खेलकुद तथा विज्ञापन कानुनको उल्लंघन भएको र विदेशी कम्पनीलाई भित्र्याउँदा पूरा गर्नुपर्ने विभिन्न कानूनी प्रक्रियाहरुलाई बेवास्था गरेको, सार्वजनिक खरिद ऐनको उल्लंघन गरेको लगायतका आरोपसहित क्यानमाथि अख्तियारमा उजुरी परेको थियो ।

एनपीएलमा भारतीय स्टार ब्याटर शिखर धवन जस्ता खेलाडी आएर खेलेका थिए भने वेष्ट इन्डिजका लेजेण्ड ब्रायन लाराले काठमाडौं आएर खेल हेरेका थिए ।