२०८१ चैत २१ गते ७:३२ 
२१ चैत, काठमाडौं । एट्लेटिको मड्रिडमाथि झिनो अन्तरको जित निकाल्दै बार्सिलोना स्पानिस कोपा डेल रे को फाइनलमा प्रवेश गरेको छ । फेरान टोरेसको एक मात्र गोलमा दोस्रो लेगमा १-० ले विजयी भएको बार्सिलोनाले समग्रमा ५-४ को जित निकालेको हो ।
एट्लेटिकोले अन्तिम समयमा दुई गोल गर्दा पहिलो लेग ४-४ को रोमाञ्चक बराबरीमा सकिएको थियो ।
तर अवे मैदानमा भएको दोस्रो लेगमा फेरान निर्णायक बन्दा बार्सिलोनाले रियल मड्रिडसँग फाइनल भेट पक्का गरेको हो । फेरानले २७औं मिनेटमा लामिन यामलको पासमा गोल गरेका थिए ।
बार्सिलोना र रियलबीच कोपा डेल रे को फाइनलमा भेट हुन लागेको यो आठौं पटक हो । फाइनल खेल अप्रिल २६ मा सेभिलमा हुनेछ ।
रियल सोसिडाडमाथि समग्रमा ५-४ कै जित निकालेर रियल मड्रिड फाइनल पुगेको हो ।
क्याटलान टोली बार्सिलोना सन् २०२५ मा युरोपको शीर्ष पाँच लिगमा अपराजित रहने एक्लो टोली हो ।
बार्सिलोना यस सिजन चार ट्रफी जित्ने लक्ष्यमा छ । स्पानिस सुपर कप जितिसकेको बार्सिलोना ला लिगामा शीर्ष स्थानमा छ र दोस्रो स्थानको रियल माथि ३ अंकको अग्रता कायम राखेको छ । युरोपियन च्याम्पियन्स लिगमा क्वाटरफाइनल पुगेको बार्सिलोना कोपा डेल रे मा फाइनल पुगिसकेको छ ।
प्रतिक्रिया 4