कुमारी बैंकले मनायो २४औं वार्षिकोत्सव

काठमाडौं । कुमारी बैंक लिमिटेडले आफ्नो २४औं वार्षिकोत्सव विविध कार्यक्रम साथ मनाएको छ ।

वार्षिकोत्सवका अवसरमा बैंकले आफ्ना ग्राहक, साझेदार तथा शुभचिन्तकको साथ र विश्वासले बैंकलाई यहाँसम्म पुर्‍याउन महत्त्वपूर्ण भूमिका खेलेको भन्दै आभार प्रकट गरेको छ ।

बैंकले आफूलाई देशकै अग्रणी वित्तीय संस्थाका रूपमा स्थापित गर्ने लक्ष्य लिएको र उत्कृष्ट बैंकिङ सेवा तथा वित्तीय सुविधाहरू प्रदान गर्न निरन्तर प्रतिबद्ध रहेको जनाएको छ ।

वार्षिकोत्सव विशेष बनाउने क्रममा बैंकले आफ्ना कर्मचारीलाई परम्परागत भेषभूषा धारण गर्न प्रेरित गरेको छ । यो कार्यक्रम आफ्नै सांस्कृतिक पहिचान जगेर्ना गर्दै संस्थागत विविधता अझ सशक्त बनाउन मद्दत पुर्‍याउने उद्देश्यले गरिएको बैंकले जनाएको छ ।

‘विविधतामा एकता’ भन्ने मूल्य मान्यता अनुरूप संस्थागत संस्कृति र सामुदायिक सेवा प्रवर्द्धन गर्दै आइरहेको बैंकको भनाइ छ । ‘सबैका लागि, सधैंका लागि’ भन्ने नारालाई आत्मसात गर्दै बैंकले समृद्ध भविष्यतर्फ सशक्त रूपमा अघि बढ्ने योजना बनाएको जनाएको छ ।

बैंकले आफ्नो वार्षिकोत्सवलाई समाजसेवा तथा मानव सेवासँग जोड्न विभिन्न स्थानमा रक्तदान कार्यक्रम आयोजना गरेको छ । यस अभियानले स्थानीय रक्त बैंकहरूमा रगतको आवश्यक आपूर्ति सहज बनाउनुका साथै जीवन बचाउने महत्त्वपूर्ण योगदान दिने विश्वास बैंकको छ ।

कुमारी बैंकले आगामी दिनमा अझ नवप्रवर्तनशील बैंकिङ समाधान ल्याउँदै ग्राहकको जीवन सहज बनाउन निरन्तर कार्य गर्ने प्रतिबद्धता जनाएको छ ।