एनओसीसँग समन्वय गर्न खेलकुदमन्त्रीलाई आइओसीको पत्र

२१ चैत, काठमाडौं । अन्तराष्ट्रिय ओलम्पिक कमिटी (आईओसी) ले युवा तथा खेलकुद मन्त्री तेजुलाल चौधरीलाई पत्र पठाउँदै नेपाल ओलम्पिक कमिटी (एनओसी) को पछिल्लो अवस्था बारे जानकारी गराएको छ ।

एनओसी रिलेसन्स, ओलम्पिक सोलिडारिटी एण्ड ओलम्पिज्म ३६५ डाइरेक्टर जेम्स म्याकलेओडले हस्ताक्षर गरेको पत्र बुधबार याव तथा खेलकुद मन्त्रीलाई पठाएको हो । जहाँ एनओसीसँग समन्वय गर्न आग्रह गरेको छ ।

उक्त पत्रमा ओलम्पिक काउन्सिल अफ एसिया (ओसिए) र एनओसीसँग मिलेर वर्तमान समस्या समाधान गर्न आइओसी प्रयासरत रहेको जनाएको छ । ‘हामी तपाईँलाई आश्वस्त पार्न चाहन्छौं कि आईओसी र ओसिएले ओलम्पिक आन्दोलन र नेपालका खेलाडीहरूको हितमा एनओसीको समग्र अवस्थालाई सकेसम्म चाँडो सुधार गर्न र सामान्य बनाउन एनओसीसँग मिलेर काम गरिरहेको छ’, पत्रमा लेखिएको छ ।

पाँचवटा राष्ट्रिय खेल संघहरुले एनओसीसँग आबद्ध नभएको भन्दै मुद्दा दायर गरेपछि विवाद उत्पन्न भएको थियो । तर १० मार्च २०२५ मा कुवेतमा ओसिएको पहलमा एनओसी र तीन पाँच संघहरुकोबीच छलफलपछि मुद्दा फिर्ता लिने सहमतिमा उनीहरुलाई एनओसीको पूर्ण सदस्यता दिने सहमति भएको कुरा पत्रमा उल्लेख गरिएको छ ।

यस्तै आइओसीले एनओसीसँग मिलेर आवश्यक सुधार र निर्वाचन प्रक्रिया स्पष्ट पार्न निरन्तर सहकार्य गरिरहेको पत्रमा उल्लेख छ । यो सबै कुरा ओलम्पिक चार्टर र एनओसीको महासभाको निर्णयअनुसार हुने पनि पत्रमा जनाएको छ ।