देशभक्ति फिल्मका परिचित बलिउड अभिनेता मनोज कुमारको निधन

मुम्बई । अभिनेता मनोज कुमारको शुक्रबार बिहान मुम्बईको कोकिलाबेन अस्पतालमा निधन भएको छ । ८७ वर्षका उनी विशेष गरी देशभक्तिपूर्ण फिल्मको लागि परिचित थिए । उनलाई भारतकुमार भनेर पनि चिनिन्थ्यो । उपकार, पूर्व पश्चिम, क्रान्ति, रोटी कपडा और मकान उनका सफल फिल्म थिए ।

छोरा कुणाल गोस्वामीले भने, ‘उहाँलाई लामो समयदेखि स्वास्थ्यमा समस्या थियो । यो भगवानको कृपा हो कि उहाँलाई आफ्नो अन्तिम घडीमा धेरै समस्याको सामना गर्नु परेन, उहाँले शान्तिपूर्वक यस संसारलाई बिदा गर्नुभयो ।’

उनको अन्तिम संस्कार भोलि बिहान ११ बजे मुम्बईको पवन हंस श्मशान स्थलमा हुनेछ । मनोज कुमार लामो समयदेखि कलेजोसम्बन्धी रोग ‘लिभर सिरोसिस’बाट पीडित थिए । उनको अवस्था बिग्रिएपछि उनलाई २१ फेब्रुअरीमा अस्पतालमा भर्ना गरिएको थियो ।

उनले ७ फिल्मफेयर अवार्ड पाएका थिए । पहिलो फिल्मफेयर सन् १९६८ मा फिल्म ‘उपकार’को लागि थियो । ‘उपकार’बाट उनले उत्कृष्ट चलचित्र, सर्वश्रेष्ठ निर्देशक, सर्वश्रेष्ठ कथा र सर्वश्रेष्ठ संवादका लागि चारवटा फिल्मफेयर पुरस्कार जिते । उनलाई सन् १९९२ मा पद्मश्रीबाट सम्मान गरियो । सन् २०१६ मा उनलाई दादासाहेब फाल्के अवार्डबाट सम्मानित गरिएको थियो ।

प्रधानमन्त्री मोदीले अभिनेता कुमारलाई श्रद्धाञ्जली अर्पण गरेका छन् । मोदीले सामाजिक संजाल ‘एक्स’मा लेखेका छन्, ‘महान अभिनेता र फिल्म निर्माता श्री मनोज कुमार जीको निधनले गहिरो दुःख लागेको छ । उनी भारतीय सिनेमाका प्रतिक थिए । उहाँको देशभक्तिको जोशका लागि विशेष रूपमा सम्झिन्थ्यो, जुन उहाँका फिल्महरूमा झल्किएको थियो । मनोज जीका कार्यहरूले राष्ट्रिय गौरवको भावना जगायो र पुस्ताहरूलाई प्रेरित गरिरहनेछ । ओम शान्ति ।’