चरणवद्ध आन्दोलनमा राप्रपा, २६ चैतमा शक्ति प्रदर्शनको तयारी

२२ चैत, काठमाडौं । पक्राउ परेका आफ्ना नेताहरू रिहाइ, तिनकुने घटनाको न्यायिक छानबिन लगायत माग राखेर राष्ट्रिय प्रजातन्त्र पार्टी (राप्रपा) ले चरणवद्ध आन्दोलन गरिरहेको छ ।

आन्दोलनका कार्यक्रम अन्तर्गत आज राप्रपाले सडक प्रदर्शन र मानव अधिकार आयोगलाई ज्ञापनपत्र बुझाएको छ । महामन्त्री राजेन्द्र गुरुङ सहितको टोलीले राष्ट्रिय मानव अधिकार आयोग पुगेर ज्ञापनपत्र बुझाएको हो ।

सडक प्रदर्शनको नेतृत्व भने पशुपति शमशेर जबरा र प्रकाश चन्द्र लोहनीले गरेका छन् । राजधानी उपत्यकाका तीन जिल्लाले निकालेको प्रदर्शनको नेतृत्व जबरा र लोहनीले गरेका हुन् ।

प्रवक्ता मोहन श्रेष्ठका अनुसार अध्यक्ष राजेन्द्र लिङदेन पूर्वनिर्धारित कार्यक्रमका निम्ति झापामा रहेकाले जबरा र लोहनीले आजको प्रदर्शनमा नेतृत्व गरेका हुन् ।

गत १५ चैतको तिनकुने प्रदर्शनमा सामेल भएकाहरुलाई प्रहरीले पक्राउ गरेर अनुसन्धान गरिरहेको छ । उक्त प्रदर्शनको नेतृत्व गर्ने राप्रपाका वरिष्ठ उपाध्यक्ष रवीन्द्र मिश्र र महामन्त्री धवल शमशेर जबरालाई पनि प्रहरीले नियन्त्रणमा लिएर अनुसन्धान गरिरहेको छ ।

तीनकुने प्रदर्शनको नेतृत्व गर्ने नवराज सुवेदी घरमै नजरबन्द छन् भने फिल्ड कमाण्डर दुर्गा प्रसाईं फरार छन् । राप्रपाले त्यसदिनको घटना छानबिन गर्न र पक्राउ परेका आफ्ना नेताहरू रिहाइको माग राखेर चरणबद्ध आन्दोलन गरिरहेको छ ।

पक्राउ परेलगत्तै २४ घण्टे समय दिएर राप्रपाले देशभर मसाल जुलुस निकालेको थियो । त्यसपछि माइतीघर मण्डलमा प्रदर्शन गरेको राप्रपाका अध्यक्ष राजेन्द्र लिङदेनले कार्यबाहक प्रधानमन्त्री प्रकाशमान सिंहलाई बिहीबार ज्ञापनपत्र बुझाएका छन् ।

तीनकुने प्रदर्शन हिंसात्मक बन्नुमा सरकार जिम्मेवार रहेको निष्कर्षसहित राप्रपाले गृहमन्त्री रमेश लेखकको राजीनामा मागिरहेको छ । गृहमन्त्री लेखकको राजीनामा, सम्बन्धित प्रहरी र प्रशासनिक नेतृत्वका अधिकारीहरुको निलम्बन लगायत माग राखेर राप्रपाले २६ चैतमा शक्ति प्रदर्शनको तयारी गरेको छ ।

प्रवक्ता श्रेष्ठका अनुसार २६ चैतमा काठमाडौंमा बागमती प्रदेश स्तरीय शक्ति प्रदर्शन हुनेछ ।