रिडी–तम्घास सडकखण्ड एक महिना बन्द हुने

२३ चैत, गुल्मी । मदन भण्डारी राजमार्गको रिडी–तम्घास सडकखण्ड एक महिना पूर्ण रुपमा बन्द हुने भएको छ ।

राजमार्गको रिडी–तम्घास सडक खण्डको पानी ट्यांकीदेखि राता माटासम्मको बाटो बन्द हुने मदन भण्डारी राजमार्ग, योजना कार्यालय गल्मीका प्रमुख इन्जिनियर रमेश चौधरीले बताए ।

सडक खण्डको ठुलढुङ्गा भिर क्षेत्रमा पहरो फोर्ने, सडक चौडा गर्ने, ग्रेड मिलाउने कार्यका लागि चैत २३ गतेदेखि वैशाख २२ गतेसम्म सडक पूर्ण रुपमा बन्द रहने चौधरीले बताए । यस समय अवधिमा वैकल्पिक सडकहरू प्रयोग गर्नका लागि कार्यालयले आग्रह गरेको छ ।

उक्त सडकको विकल्पमा पानीट्याङकी थोर्गा, स्याल बिसौनादेखि रातामाटा सडक हुँदै रिडी, पिपलनेटा दिगाम, रिडी, लुम्छा, धरमपानी, दिगाम हुँदै रिडी र घुम्ती, चारपाला, खरज्याङ हुँदै रिडी सडकखण्ड प्रयोग गर्नका लागि कार्यालयले आग्रह गरेको छ ।

अहिले रिडी–तम्घास सडक स्तरोन्नतीको काम तीव्र गतीमा अगाडी बढेको छ । सडक ट्याक खुलेको ४३ वर्षपछि स्तरोन्नती भइरहेको छ । मदन भण्डारी राजमार्गको गुल्मी खण्डको रिडी–तम्घास सडकको राजासम्म स्तरोन्नती गर्ने कार्य हुँदै आएको छ । सडकको २५ किलोमिटर क्षेत्रमा अहिले स्तरउन्नतीको काम तीव्र रुपमा भइरहेको छ ।

राजमार्गको ५५ प्रतिशत भौतिक प्रगती र ४५ प्रतिशत वित्तिय प्रगती भएको मदन भण्डारी योजना कार्यालयका सूचना अधिकारी इन्जिनियर हुमानाथ पौडेलले बताए । निर्माण व्यवसायीले आउदो असारसम्म ८ किलोमिटर कालोपत्रे, ३ किलोमिटर ढलानको काम सम्पन्न गर्ने गरि काम अगाडी बढेको उनले बताए ।

बर्खासम्म २५ किलोमिटर क्षेत्रको नाली निर्माण र ग्राभेलको काम पनि सम्पन्न हुने इन्जिनियर पौडेलले बताए । सडकको कटिङ्गको काम सकिएकोे समानन्तर इलाइट जेभीले जनाएको छ ।

सवारी साधनको वृद्धिसँगै पुरानो बाटोले साँघुरो हुँदै गएपछि रिडीबाट तम्घाससम्मको ४५ किलोमिटर सडक विस्तार हुँदैछ । पहिलो चरण २५ किलोमिटर सडक स्तरउन्नतीसँगै कालोपत्रे हुन लागेको हो ।

मदन भण्डारी राजमार्गको रिडी–तम्घास सडक खण्डमा समान्तर इलाइट जेभीले निर्माण कार्य गर्दै आएको छ । २०७९ साल फागुन २८ गते सम्झौत भइ २०८२ साल फागुन २५ गतेसम्म काम सम्पन्न गर्नुपर्ने म्याद रहेको छ ।

१ अर्ब ५० करोड ४८ लाख ३२ हजार ९५९ रुपैयाँको लागतमा सडक स्तरोन्नती र कालोपत्रे गर्ने गरी ठेक्का सम्झौता भएको मदन भण्डारी राजमार्ग योजना कार्यालयले जनाएको छ ।