हजुरआमाको चप्पल लिन जाँदा भाइ नारायणीमा डुबे, उद्धार गर्न खोज्दा दिदी पनि बेपत्ता

नारायणी नदी (फाइल तस्वीर)

२६ चैत, नवलपुर (नवलपरासी) । नारायणी नदीमा डुबेर दुई जना बेपत्ता भएका छन् ।

नवलपरासी (बर्दघाट–सुस्तापूर्व)को गैंडाकोट–१ स्थित ब्रिटिस क्याम्प नजिकै नारायणी नदीमा डुबेर आज साँझ दिदीभाइ बेपत्ता भएका प्रहरीले जनाएको छ ।

इलाका प्रहरी कार्यालय गैंडाकोटका निमित्त प्रमुख प्रहरी नायब निरीक्षक सानुकाजी विष्टले गैँडाकोट–१ का विष्णु सेर्पुञ्जाकी छोरी १३ वर्षीया दीक्षा सेर्पुञ्जा र नौ वर्षीय स्वप्निल सेर्पुञ्जा नदी डुबेर बेपत्ता भएको जानकारी दिए ।

‘दुवै बालबालिका हजुरआमा सुनमाया कुमालसँग नदीमा गई फर्किने बेलामा हजुरआमाको चप्पल छुटेर लिन जाँदा नदीमा डुबेर बेपत्ता भएका हुन्,’ उनले भने, ‘भाइ नदीमा गएपछि दिदीले उद्धार गर्न खोज्दा दिदी पनि बेपत्ता भएको जानकारी आएको छ ।’

बेपत्ता दुवै जनाको खोजी भइरहेको विष्टले जानकारी दिए ।

प्रहरीसँग गोताखोर नभएकाले आजको लागि खोजीकार्य रोकिएको र भोलि बिहानैदेखि गोताखोरको टोलीसहित खोजी गरिने प्रहरीले जनाएको छ ।