‘राअवि’को टोली एआईजी बढुवामा छुट्यो

४ वैशाख, काठमाडौं । राष्ट्रिय अनुसन्धानबाट स्थानान्तरण भएर नेपाल प्रहरीमा आएको टोली अतिरिक्त महानिरीक्षक (एआईजी) बढुवामा छुटेको छ ।

यो टोलीबाट सिद्धिबिक्रम शाह, सुशील सिंह राठौर, उमा चतुर्वेदी, हिमालयकुमार श्रेष्ठलगायत बढुवाको प्रतिस्पर्धामा थिए । तर उनीहरु सबै जना एआईजी बढुवा सिफारिसमा परेनन् ।

हाल प्रहरी प्रधान कार्यालय, नक्साल विशेष ब्यूरोको नेतृत्व गरिरहेका शाहलाई एआईजीमा बढुवा गर्न सत्तारुढ नेपाली कांग्रेसको तीव्र दबाब थियो । तर, बालुवाटारले २०५४ सालमा भर्ना भएका अधिकारी र केसीलाई समेट्ने अडान राखेपछि केही समय बढुवा सिफारिस रोकिएको थियो ।

अन्तिममा राष्ट्रिय अनुसन्धान विभागबाट आएको टोली नै बढुवामा छुटेको छ । उनीहरुलाई तत्कालीन कांग्रेस नेता खुमबहादुर खड्का गृहमन्त्री भएका बेला नेपाल प्रहरीमा स्थानन्तरण गराइएको थियो ।

तत्कालीन आईजीपी अच्युतकृष्ण खरेलले राष्ट्रिय अनुसन्धान विभागबाट प्रहरीमा ल्याउने प्रस्ताव सुरुमा अस्वीकार गरेका थिए । पछि खरेल हटेर प्रदीपशमशेर जबरा आईजीपी भएका बेला २५ पुस २०५८ मा ३० इन्स्पेक्टरसहित ४६ जनालाई नेपाल प्रहरीमा स्थान्तरण गरिएको थियो ।

राअविबाट प्रवेश गरेकाहरू प्रहरी संगठनमा कांग्रेस प्रतिपक्षमा रहेका बेला प्रायः पछाडि परिरहे । हुन पनि यो टोलीका थुप्रै अधिकृतहरू विवादमा मुछिइरहे ।

यो पनि पढ्नुहोस

दुई ब्याच उछिनेर डीआईजी बढुवा, राष्ट्रिय अनुसन्धानबाट आएको टोली नै छुट्यो

तर, राअविबाट आएकाहरुमा पनि केही यस्ता व्यावसायिक अफिसरहरू छन्, जसले दुई दशकभन्दा बढी समय व्यावसायिक काम गर्दा पनि आफूहरूलाई ‘फरक दर्जा’का अधिकृतहरू जस्तो व्यवहार गरिएको भन्दै गुनासो गर्छन् । ‘हामी पनि उनीहरूले जस्तै लोकसेवा दिएर आएको हो, उनीहरूले जस्तै तालिम पनि गरेको हो’, एक अधिृकत भन्छन् ।

राअविभन्दा पछिल्लो ब्याचबाट दानबहादुर कार्की, राजन अधिकारी र डा. मनोजकुमार केसी बढुवा सिफारिसमा परेपछि यो टोलीलाई प्रहरी महानिरीक्षक बन्न कठिन हुने देखिएको छ । बीचमा खाली हुने दरबन्दीमा बढुवा नभए सिधै कार्की, अधिकारी र केसीमध्ये एक जना आईजीपी बन्नेछन् ।

२०५३ साल भर्ना मिति भएका राअविका टोली रवि लामिछाने गृहमन्त्री हुँदा डीआईजी बढुवामा समेत छुटेका थिए ।

अहिले बढुवा सिफारिसमा परेकामध्ये पहिलो नम्बरमा चन्द्रकुवेर खापुङ, दोस्रोमा लालमणि आचार्य र तेस्रोमा कृष्णहरि शर्मा पोखरेल छन् ।