७ वैशाख, काठमाडौं । राष्ट्रिय प्रजातन्त्र पार्टी (राप्रपा)को प्रदर्शनलाई लक्षित गरी सिंहदरबार वरपर सुरक्षा व्यवस्था कडा पारिएको छ । प्रमुख प्रशासनिक केन्द्र सिंहदरबार क्षेत्रका चारैतर्फका सडकमा सवारी साधन सञ्चालनमा रोक लगाइएको छ ।
सिंहदरबार दक्षिण गेट, हनुमानथान, अनामनगर, वैद्यखाना, न्यूप्लाजा, सिंहदरबार पश्चिम गेट र स्वास्थ्य मन्त्रालयतर्फका सडक सुनसान छन् ।
त्यहाँ ब्यारिकेड राखेर बाटो बन्द गरिएको छ । त्यसैले ती सडकहरु सुनसान छन् ।
सुरक्षाकर्मीहरु बाक्लो संख्यामा तैनाथ छन् । सिंहदरबारको पर्खाल वरिपरि दंगा नियन्त्रण बललाई खटाइएको छ ।
माइतीघरस्थित अन्नपूर्ण न्यूरो अस्पताल नजिक पनि दंगा नियन्त्रण टोली र पानीको फोहोरा हान्ने गाडी तैनाथ गरिएको छ ।
सिंहरदबार भित्र प्रवेशमा पनि सर्वसाधारणलाई कडाइ गरिएको छ । सीमित संख्यामा आगन्तुकहरुलाई सुरक्षाकर्मीहरुले केरकार गरेर मात्रै जान दिएका छन् ।
राप्रपाले आज तीनकुने घटनाको न्यायिक छानबिन गर्नुपर्ने, पक्राउ परेका आफ्ना नेताहरुको रिहाइ गर्नुपर्ने लगायतका माग राखेर काठमाडौंमा आज प्रदर्शन आयोजना गरेको छ ।
प्रदर्शनस्थलमा जानुअघि नै प्रहरीले सिंहदरबारभित्रबाट राप्रपा अध्यक्ष राजेन्द्र लिङ्देनसहितका नेताहरुलाई नियन्त्रणमा लिएको छ । उनीहरुले आफ्ना माग लेखिएका पम्प्लेट बोकेर सिंहदरबारभित्रै प्रदर्शन गरेपछि प्रहरीले नियन्त्रणमा लिएर काठमाडौं प्रहरी परिसरमा लगेर राखेको छ । अन्य नेता–कार्यकर्ताहरुले भने अध्यक्ष लिङ्देनसहितलगायतको रिहाइको माग गर्दै प्रदर्शन गरेका छन् ।
राप्रपाको प्रदर्शनको कारण आज ट्राफिक व्यवस्थापन अस्तव्यस्त बनेको छ ।
यो खबर पढेर तपाईलाई कस्तो महसुस भयो ?
खुसी
दुःखी
अचम्मित
उत्साहित
आक्रोशित
प्रतिक्रिया
Hot Properties
प्रतिक्रिया 4