शीर्ष तहमा छलफल गरेर निजामती विधेयक टुंग्याइने

१० वैशाख, काठमाडौं । निजामती विधेयकमा मिल्न बाँकी रहेका विषयमा शीर्ष नेतृत्वबीच छलफल गरेर टुंगो लगाइने भएको छ ।

बुधबार (आज) बाट यो विधेयकमाथिको छलफल सकिएको छ । आज बसेको प्रतिनिधि सभा अन्तर्गतको राज्य, व्यवस्था तथा सुशासन समितिको बैठकबाट विधेयक पास गर्ने तयारी गरिएको थियो ।

सोही तयारीस्वरुप प्रधानमन्त्री केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डलाई पनि समितिमा बोलाइएको थियो । प्रचण्ड समितिका सदस्य पनि हुन् ।

तर, उनीहरू दुवै बैठकमा उपस्थित भएनन् ।

समितिका सभापति रामहरि खतिवडाका अनुसार, अब विधेयकमाथि शीर्ष तहमा छलफल गर्ने तयारी छ । प्रचण्डले प्रधानमन्त्री ओली र नेपाली कांग्रेसका सभापति शेरबहादुर देउवासँग विधेयकका केही जटिल विषयमाा कुरा गर्ने बताएका छन् ।

कुलिङ पिरियड, प्रदेश सचिव, प्रमुख प्रशासकीय अधिकृत लगायतका महत्त्वपूर्ण विषयमा प्रचण्डले छलफल गर्न खोजेका हुन् ।

समितिका सभापति रामहरि खतिवडा र उपसमितिका संयोजक दिलेन्द्रप्रसाद बडूले उक्त छलफलको संयोजक गर्नेछन् ।