२०८२ वैशाख ११ गते १८:०० 
११ वैशाख, काठमाडौं । अखिल नेपाल फुटबल संघ (एन्फा) ले आयोजना गर्ने भनिएको लिगकम नकआउट फुटबल प्रतियोगिता नहुने भएको छ ।
एन्फाले एएफसी क्लब च्याम्पियनसिप प्रतियोगितामा टिम पठाउने लक्ष्यसहित ए डिभिजन क्लबहरु समावेश गरेर यही २० वैशाखदेखि लिगकम नकआउट प्रतियोगिता गर्ने निर्णय गरेको थियो ।
तर टिम दर्ता गर्नका लागि तोकिएको समय वैशाख १० गतेसम्म ४ टिमले मात्र नाम दर्ता गराएपछि अब नकआउट प्रतियोगिता नहुने एन्फा प्रवक्ता सुरेश शाहले जानकारी दिए ।
‘चार क्लब मात्र दर्ता भएका छन् । क्लबहरुले खेल्न नचाहेपछि ४ क्लबको मात्र गरेर भएन । क्लबहरुले इच्छा देखाएमा एन्फाले खेलाउने हो’ शाहले भने ।
यसअघि ए डिभिजनका ९ क्लबहरूले तयारी समय कम भएको, प्रक्रिया नपुर्याई नकआउट प्रतियोगिता गर्न लागेको भन्दै नखेल्ने निर्णय गरेका थिए ।
तीन विभागीय टोली त्रिभुवन आर्मी एफसी, नेपाल पुलिस क्लब र एपीएफ क्लबसहित संकटा क्लबले मात्र बुधबारसम्म नाम दर्ता गराएका थिए ।
तोकिएको समयमा ४ टिमले मात्र नाम दर्ता गराएपछि एन्फाले बिहीबार नै क्लबहरूलाई पत्र पठाउँदै प्राविधिक कारणले लिगकम नकआउट प्रतियोगिता निर्धारित मिति वैशाख २० गते नहुने जानकारी गराएको हो ।
लिगकम नकआउट प्रतियोगिता नहुने भएपछि अब एएफसी क्लब च्याम्पियनसिपमा नेपाली क्लबको सहभागिता समेत अन्योलमा परेको छ ।
एन्फा प्रवक्ता शाहका अनुसार कुनै प्रतियोगिता नभएपछि एएफसी क्लब प्रतियोगितामा नेपालको सहभागिता नहुने बताए ।
प्रतिक्रिया 4