१२ वैशाख, काठमाडौं । सर्वसाधारणलाई बीच बाटोमै कुट्ने चार जना ट्राफिक प्रहरीमाथि आन्तरिक छानबिनको प्रक्रिया अघि बढेको छ ।
ट्राफिक प्रहरी वृत्त जनसेवामा कार्यरत रहेका चारै जनालाई बिहीबार जिम्मेवारी खोस्दै काठमाडौं उपत्यका ट्राफिक प्रहरी कार्यालय तानिएको थियो । अहिले उनीहरूमाथि आन्तरिक छानबिनको प्रक्रिया अघि बढाइएको उपत्यका ट्राफिक प्रहरी कार्यालय प्रवक्ता दीपक गिरीले बताएका छन् ।
प्रारम्भिक अनुसन्धानका क्रममा उनीहरूले पहिला ट्राफिकमाथि नै दुर्व्यवहार भएको दाबी गरेका छन् । ‘ट्राफिक नियम उल्लंघन गरेको विषयमा विवाद हुँदा सुरुमा उनैले हामीमाथि दुर्व्यवहार गरेका हुन् । यो भिडिओ भने काटेर एक पक्षीय भिडिओ मात्रै सार्वजनिक भएको छ,’ छानबिनमा रहेका ट्राफिकको भनाइ उद्धृत गर्दै प्रवक्ता गिरी भन्छन् ।
तर, सुरुमा नियम उल्लंघन गर्नेले नै दुर्व्यवहार गरेको भए समातेर प्रहरीको जिम्मा लगाउनुपर्नेमा त्यसो नगरी उनीमाथि कुटपिट हुनु ट्राफिक प्रहरीकै कमजोरी रहेको उनी बताउँछन् ।
‘घटना जे भए पनि ट्राफिक प्रहरीले कुटपिट गर्न मिल्दैन । समाएर जिम्मा लगाउनुपर्नेमा त्यसो नगरको देखिएकाले छानबिन सकेर विभागीय कारबाही हुन्छ,’ प्रवक्ता गिरी भन्छन् । छानबिनमा रहेको भनिएका ट्राफिक प्रहरीको नाम भने सार्वजनिक गरिएको छैन ।
यो घटना गत ११ मंसिरको हो । काठमाडौंको सुन्धारास्थित आकाशे पुलमुनि कुटपिट भएको थियो । ६ महिनापछि बिहीबार मात्रै उक्त भिडिओ सार्वजनिक भएको थियो । यतिन्जेल भिडिओ सार्वजनिक नभएर अहिले हुनु पनि शंकास्पद भन्दै प्रहरीले छानबिन गरिरहेको छ ।
सार्वजनिक भिडिओमा चार जना ट्राफिक प्रहरी देखिन्छ । उनीहरूबाट एक व्यक्तिलाई लडाएर कुटपिट गरेको देखिएको छ । बुट लगाएका ट्राफिक प्रहरीले ती व्यक्तिलाई निर्ममतापूर्वक अनुहारमै प्रहार गरेको देखिन्छ । कुटपिट गर्दै कागजपत्र भुईँमै फ्यालेर एक ट्राफिक प्रहरी हिँडेको देखिन्छ ।
यो खबर पढेर तपाईलाई कस्तो महसुस भयो ?
खुसी
दुःखी
अचम्मित
उत्साहित
आक्रोशित
प्रतिक्रिया
Hot Properties
.png)
प्रतिक्रिया 4