२०८२ वैशाख १४ गते २१:२५ 
१४ वैशाख, काठमाडौं । एकेएफ एसियाली सिनियर कराते च्याम्पियनसिपको २१ औं संस्करणका लागि नेपालबाट १२ खेलाडी छनोट भएका छन् । ७ पुरुष र ५ महिला गरी १२ खेलाडी छनोट भएको कराते प्रशिक्षक कुशल श्रेष्ठले जनाएका छन् ।
२०औं संस्करणमा ऐतिहासिक रजत पदक जितेकी कराते स्टार एरिका गुरुङसहित खेलाडीहरु छनोट भएका छन् ।
नेपाल कराते महासंघले सातदोबाटोस्थित कराते हलमा आइतबार आयोजना गरेको छनोट प्रतियोगिताबाट खेलाडी छनोट भएका हुन् ।
पुरुषको ५५ केजीमुनि साजन मोक्तान, ६० केजीमुनि मिनबहादुर तामाङ, ६७ केजीमुनि सन्तोष श्रेष्ठ, ७५ केजीमुनि शिबु ओड, ८४ केजीमुनि मोहम्मद शेखु आलम, ८४ केजीमाथि तेन्जिङ शेर्पा र एकल कातामा सोनिम मानन्धर छनोट भए ।
यस्तै महिला एकल कातामा सानुमाया थिङ, ५० केजीमुनि अन्जली महर्जन, ५५ केजीमुनि सविना श्रेष्ठ, ६१ केजीमुनि निरुपमा तामाङ र ६८ केजीमाथि एरिका गुरुङ छानिए ।
एरिकाले गत वर्ष सेप्टेम्बरमा चीनमा भएको २०औं एसियाली कराते च्याम्पियनसिपमा रजत पदक जितेकी थिइन् ।
छनोट प्रतियोगितामा विभिन्न राष्ट्रिय तथा अन्तर्राष्ट्रिय प्रतियोगिताका स्वर्ण विजेता खेलाडीले सहभागिता जनाएको प्रशिक्षक श्रेष्ठले जानकारी गराए । एसियाली कराते उज्वेकिस्तानको तास्केन्टमा आगामी मे २३ देखि २५ तारिखसम्म हुनेछ ।
प्रतिक्रिया 4