पर्यटन बोर्डमा बारपाकका तस्वीर प्रदर्शन हुँदै

News Summary

Generated by OK AI. Editorially reviewed.

नेपाल पर्यटन बोर्डले ‘फोटो नेपाल’ अभियानअन्तर्गत बारपाकको तस्वीर प्रदर्शन गर्ने योजना बनाएको छ।
यस प्रदर्शनीले गोरखा भूकम्पको १० वर्षपछिको पुनर्निर्माण र पुनर्जीवनको कथा चित्रण गर्दछ।
साथै, बोर्डले भीमप्रसाद शर्माको कला प्रदर्शनी आयोजना गरी आध्यात्मिक र चेतनामूलक विषयवस्तु प्रस्तुत गर्दैछ।

३० वैशाख, काठमाडौं । नेपाल पर्यटन बोर्डमा बारपारका तस्वीर प्रदर्शनमा राखिने भएको छ ।

बोर्डले आफ्नो प्रमुख अभियान ‘फोटो नेपाल’ अन्तर्गत जेठमा नेपालको भावनात्मक गहिराइ, सिर्जनात्मकता र साहसी आत्मा उजागर गर्ने दुई प्रेरणादायी प्रदर्शनी आयोजना गर्न लागेको जनाएको छ ।

यस महिना १–३ जेठसम्म फोटो पत्रकार प्रकाशचन्द्र तिमल्सेनाको बारपाक फोटो प्रदर्शनी राखिने बोर्डले जनाएको छ । गोरखा भूकम्पको १० वर्षपछिको स्मृति दिवसका अवसरमा आयोजना गरिँदै गरेको यो प्रदर्शनीले बारपाकको पुनर्निर्माण र पुनर्जीवनको यात्रालाई तस्वीरका माध्यमबाट चित्रण गर्ने समेत बोर्डले जनाएको छ ।

बोर्डको यो अभियानले विभिन्न व्यक्ति र संस्थाको सहकार्यमा नेपालका दृश्य सम्पदा र सामूहिक स्मृति दस्तावेज गर्दै आएको छ । ४–१० जेठसम्म पर्यटन बोर्डले प्रतिष्ठित कलाकार भीमप्रसाद शर्मा को १३औं एकल कला प्रदर्शनी (कुण्डलिनी) प्रस्तुत गर्ने समेत जनाएको छ ।

ऊर्जा, चेतना र आध्यात्मिक रूपान्तरणका विषयवस्तु आधार बनाएको कला प्रदर्शनीले रङ, रूप र प्रतीकहरूको प्रयोग मार्फत दर्शकलाई आन्तरिक यात्राको सन्देश दिने बोर्डले उल्लेख गरेको छ ।

पर्यटन बोर्डका प्रमुख कार्यकारी अधिकृत दीपकराज जोशी नेपाललाई दृश्यहरूका माध्यमबाट विश्वभरि प्रेरणा दिने कामको प्रयास गरिएको बताउँछन् ।