‘उपकुलपतिको कार्यालयमा तोडफोड गर्नु अपराध हो, कारबाही हुनुपर्छ’

News Summary

Generated by OK AI. Editorially reviewed.

त्रिभुवन विश्वविद्यालयका पूर्वउपकुलपति केदारभक्त माथेमाले तोडफोड गर्नेलाई कानुनी कारबाही हुनुपर्ने बताए।
गत जेठ १४ गते नेविसंघका नेता कार्यकर्ताले विश्वविद्यालयको कार्यालयमा तोडफोड गरे पनि पक्राउ परेका छैनन्।
माथेमाले विश्वविद्यालयको सुरक्षाका लागि सरकारको कडाइ आवश्यक रहेको र दण्डहीनता हुनु नहुने बताए।

२५ जेठ, काठमाडौं । त्रिभुवन विश्वविद्यालयका पूर्वउपकुलपति केदारभक्त माथेमाले उपकुलपतिको कार्यालयमा तोडफोड गर्नेलाई कारबाही हुनुपर्ने बताएका छन् ।

‘त्रिवि सार्वजनिक संस्था हो । उपकुलपतिको कार्यालयमा तोडफोड हुनु अपराध हो । सरकार कडारुपमा प्रस्तुत हुनुपर्छ,’ अनलाइनखबरसँग माथेमाले भने ।

गत जेठ १४ गते स्नातक तहको भर्ना खुलाउनु पर्ने माग राखेर गएका नेविसंघका नेता कार्यकर्ताले उपकुलपतिको कार्यालयमा तोडफोड गरेका थिए । तर तोडफोडमा संलग्नलाई कारबाही गरिएको छैन ।

पूर्वउपकुलपति माथेमा तोडफोड गर्नेलाई कानुनी कारबाही हुनुपर्ने बताउँछन् । ‘विश्वविद्यालयको आफ्नो प्रहरी छैन । भीसी, रेक्टर, रजिस्ट्रारसँग सुरक्षाकर्मी छैन। तोडफोड गर्नेलाई सरकारले कानुनी दायरामा ल्याउनु पर्छ,’ माथेमाले भने, ‘दण्डहीनता हुनु भएन ।’

तोडफोड र तालबन्दीका कारण उपकुलपति खड्ग केसी, रेक्टर दुविनन्द ढकाल र रजिस्ट्रार केदारप्रसाद रिजाल कार्यकक्षमा जान सकेका छैनन् । त्रिविलाई प्रहरीलाई जाहेरी दिएपनि तोडफोडमा संलग्न भएकाहरूलाई पक्राउ गरिएको छैन ।