भिजिट भिसा प्रकरणविरुद्ध अभियान सुरु गरेर रास्वपाले तेस्रो वार्षिकोत्सव मनाउने

News Summary

Generated by OK AI. Editorially reviewed.

राष्ट्रिय स्वतन्त्र पार्टीले भिजिट भिसा प्रकरणविरुद्ध देशव्यापी अभियान सञ्चालन गर्ने निर्णय गरेको छ।
बैठकले ७ असारमा पार्टीको तेस्रो वार्षिकोत्सव मनाउने र संसदीय गतिविधि सशक्त बनाउने निर्णय गरेको छ।
सचिवालयले नयाँ पदाधिकारी नियुक्ति र पार्टीको नीति तथा विचार विभाग प्रमुख चयन पनि गरेको छ।

५ असार, काठमाडौं । राष्ट्रिय स्वतन्त्र पार्टी (रास्वपा) ले भिजिट भिसा प्रकरणविरुद्ध अभियान सञ्चालन गरेर तेस्रो वार्षिकोत्सव मनाउने भएको छ ।

बिहीबार बिहान बसेको सचिवालय बैठकले ‘लुटतन्त्रको खारेजी एवं सुसंस्कृत राजनीतिको संवर्द्धनका लागि सडक र संसदमा’ भन्ने नारासहित देशव्यापी अभियान सञ्चालन गर्ने निर्णय गरेको छ । अभियान सुरु हुनुअघि ७ असारको बिहान ७ बजे पार्टीको केन्द्रीय समिति बैठक बोलाइएको छ ।

सचिवालय बैठका सभापति रवि लामिछानेमाथि लगाइएको ‘झुट्टा र प्रतिशोधपूर्ण’ मुद्दाको वर्तमान अवस्था र भिजिट भिसा काण्डमा पार्टीको संसदीय गतिविधिबारे छलफल गर्ने निर्णय गरिएको छ । भिजिट भिसा काण्डमा अझ सशक्त रूपमा संसदमा प्रस्तुत हुन संसदीय दललाई निर्देशन दिने निर्णय गरिएको छ ।

७ असारमा पर्ने रास्वपाको पार्टी गठनको दिनमा यस अघिका दुई वर्ष रास्वपाले केन्द्रीय कार्यालयमा चियापान गरेर वार्षिकोत्सव मनाउने गरेको थियो ।

बैठकले नीति तथा विचार विभाग प्रमुख डा. स्वर्णिम वाग्ले, उपप्रमुख सन्तोष परियार मनोनीत गरेको छ । अभियान तथा प्रचारप्रसार विभाग प्रमुखको जिम्मेवारी मनीष झाले पाएका छन् । केन्द्रीय सदस्य राजन गौतमलाई कृषि विभागको प्रमुख बनाउने निर्णय भएको छ ।