विपक्षीको अवरोधपछि मधेश प्रदेशसभा स्थगित

News Summary

Generated by OK AI. Editorially reviewed.

मधेश प्रदेशसभा बैठक विपक्षी दलहरूको अवरोधका कारण स्थगित भएको छ।
विपक्षी दलहरूले बजेट पुनर्लेखनको माग गर्दै बैठक अवरुद्ध गरे।
बैठक भोलि दिउँसो १ बजे पुनः बस्ने कार्यसूची तय भएको छ।

२२ असार, जनकपुरधाम । विपक्षीको अवरोधपछि मधेश प्रदेशसभा बैठक भोलिसम्मका लागि स्थगित भएको छ । विपक्षी दलहरू जसपा नेपाल, नेकपा माओवादी केन्द्र, नेकपा एकीकृत समाजवादी लगायतको विपक्षी दलले बजेट पुनर्लेखनको माग गर्दै अवरुद्ध गरेका थिए ।

अवरोधपछि सभामुख रामचन्द्र मण्डलले बैठक आधा घण्टाका लागि स्थगित गरेका थिए । तर पुन: बस्ने वातावरण नमिलेपछि बैठक बस्नै सकिएन । भोलि दिउँसो १ बजे बस्ने गरी बैठक स्थगित गरेको सभामुख मण्डलले बताए ।

मधेश सरकारले १ असारमा ल्याएको बजेटबारे सत्तापक्ष र प्रतिपक्षमा व्याप्त असन्तुष्टि छ । बिचौलिया हावी, असमान बजेट, ५ लाखसम्मको बजेट विनियोजन भएको पुनर्लेखन गर्नुपर्ने विपक्षी दलहरूको माग छ । विपक्षी दलले बजेट पुनर्लेखन नभएसम्म सदन चल्न नदिने चेतावनी दिएको छ ।

‘यसअघि यसै मुख्यमन्त्रीले बजेट ल्याउँदा ह्याक भएको बताएको र अहिले उनकै दलका नेता बिचौलिया हाबी भएको भन्छन् । प्रतिपक्षीले पहिले नै भनिसकेको छ । २० वर्ष पहिलेसम्मका भुक्तानीका लागि मुख्यमन्त्रीको पिताको नाममा बजेट राखिएको छ । जबसम्म समान बजेट हुँदैन । बिचौलिया हाबी रहन्छ । तबसम्म कुनै पनि हालतमा बजेट पारित हुन दिन्नौं,’ जसपा नेपालका प्रमुख सचेतक रामआशिष यादवले बैठक अवरुद्ध गर्दै चेतावनी दिएका थिए ।

बजेटमाथि छलफलको लागि गत १२ असार दिउँसो १ बजे बोलाइएको बैठक अचानक स्थगित गरिएको थियो । त्यसको ११ दिनपछि पुन: बैठक बसेको थियो ।