बीमा प्राधिकरणको पहिलो नीति तथा कार्यक्रम : सरकारी विद्यालयका विद्यार्थीको बीमा गर्ने

२४ असार, काठमाडौं । नेपाल बीमा प्राधिकरणले पहिलो पटक नीति तथा कार्यक्रम ल्याएको छ । नीति तथा कार्यक्रममा प्राधिकरणले आगामी आर्थिक वर्षका कार्यक्रम तथा नियामकीय योजना एकीकृत गरेको छ ।

गत वैशाख मसान्तसम्म कुल जनसंख्याको ४७.३९ प्रतिशतमा जीवन बीमा पहुँच पुगेको छ भने ५२.६१ प्रतिशत जनसंख्या बीमा पहुँच बाहिर रहेको प्राधिकरणले जनाएको छ ।

बीमा विस्तारका लागि प्राधिकरणमा हाल कार्यरत १ सय ५८ जना र बीमा कम्पनीमा वैशाख मसान्तसम्म कार्यरत १२ हजार १ सय ६२ कर्मचारीको कार्यक्षमता अभिवृद्धि गर्दै अनुसन्धानमूलक तथा आवश्यकतामा आधारित नवीनतम बीमालेख निर्माण गर्न पहल गरिने प्राधिकरणले जनाएको छ ।

आगामी दिनमा ग्राहक केन्द्रित सेवा र वितरण प्रणाली विकास गर्न तथा बीमा साक्षरतामा जोड दिन आवश्यक रहेको प्राधिकरणले जनाएको छ ।

मोबाइल एप, टेलिम्याटिक्स, इन्स्योरटेक, सुपरटेक लगायत डिजिटल प्रणाली प्रयोग गरी प्रविधिमैत्री बीमा सेवा प्रदान गर्न अपरिहार्य भएको समितिको बुझाइ छ ।

बीमकले प्रविधि प्रयोगद्वारा यथाशीघ्र दाबी भुक्तानी गर्दै बीमा क्षेत्रमा पारदर्शिता र जवाफदेहिता कायम गर्न प्राधिकरणले प्रभावकारी बीमा नियमन तथा सुपरीवेक्षण प्रणाली विकास गर्ने योजना गरेको जनाएको छ ।

चालु आव २०८१/८२ तेस्रो त्रैमाससम्म बीमकहरूको ८ खर्ब ४७ अर्ब १२ करोड लगानी सुरक्षित र प्रभावकारी बनाउँदै बीमकहरूको वित्तीय स्थायित्व, जोखिम व्यवस्थापन तथा बीमित हित संरक्षण गर्न बीमा प्राधिकरणले सक्रिय नियामक निकायको भूमिका निभाउने प्रतिबद्धता जनाएको छ ।

प्राधिकरणले ‘सहज पहुँचयुक्त, विश्वसनीय, सुदृढ र गुणस्तरीय बीमा प्रणालीको विकास’ गर्ने सोचसहित नीति तथा कार्यक्रम ल्याएको जनाएको छ ।

त्यसैगरी प्रतिस्पर्धी विश्वसनीय बीमा प्रणाली विकास एवं विस्तार गरी बीमा क्षेत्रमा थप संस्थागत सुशासन कायम गर्ने लक्ष्य  प्राधिकरणको छ ।

बीमा सेवाको गुणस्तर अभिवृद्धि गरी आधुनिक तथा दिगो बीमा प्रणालीे विकास गर्ने उद्देश्य राखेको प्राधिकरण अध्यक्ष शरद ओझाले बताए ।

जीवन, सम्पत्ति तथा दायित्वको जोखिम न्यूनीकरण गर्दै सबल अर्थतन्त्र निर्माणमा योगदान पुर्‍याउने तथा बीमा क्षेत्रलाई व्यवस्थित, प्रतिस्पर्धी, विकसित तथा विश्वसनीय बनाउनमा विशेष जोड दिने ओझाको भनाइ छ ।