फिल्म छायांकन सेटमा गाउँदा गाउँदै ढले थानेश्वर

News Summary

Generated by OK AI. Editorially reviewed.

फिल्म ‘जनै हराएको मान्छे’को गीतको छायांकनको क्रममा गायक थानेश्वर गौतम बेहोस भए।
उनीलाई पानी खुवाएर होसमा ल्याइयो र पुनः छायांकन जारी रह्यो।
थानेश्वरले आफू भावनामा बसेको र मानसिक रुपमा विक्षिप्त भएको बताए।

काठमाडौं । सन्दर्भ थियो- फिल्म ‘जनै हराएको मान्छे’को गीतको छायांकन । मंगलबार राती बुढानिलकण्ठको एक ब्यांक्वेटमा फिल्मको गजल गायनको दृश्य खिच्ने काम भैरहेको थियो र थानेश्वर गौतम गाउँदै थिए ।

‘आधाआधी सपनाहरू भैदिएन पुरा’ बोलको गीत भावनामा डुबेर गाउँदै थिए थानेश्वर । उनको गायकीमा दर्शक मन्त्रमुग्ध भएर सुन्दै थिए । प्राविधिक यो दृश्यलाई क्यामेरामा कैद गर्दै थिए ।

गाउँदा गाउँदै थानेश्वर अचानक बेहोस भएर हार्मोनियममाथि ढले । त्यसपछि छायांकन सेटको माहोल बदलियो । फिल्मको क्रू र उपस्थित पत्रकार आत्तिए र हतास देखिए ।

स्टेजबाट तल झारेर थानेश्वरलाई पानीले छम्कियो र बेन्चमा सुताइयो । केही छिनपछि उनी होसमा आए । होसमा आएपछि थानेश्वरले गीत गाउँदा आफू भावनामा बहेको र मानसिक रुपमा विक्षिप्त बनेको बताए ।

सबै कुरा ठीकठाक भएपछि थानेश्वर पुनः तयार भए अनि छायांकन सुरु गरियो । ‘उहाँको शरिरमा पानीको अभाव भएको रहेछ । केही समयपछि ठीक हुनुभयो र छायांकन सक्यौं’ फिल्मका सहायक निर्देशन मनीष राउतले अनलाइनखबरलाई भने ।

प्रदर्शन तयारीमा रहेको फिल्म ‘जनै हराएको मान्छे’को अहिले छायांकन भैरहेको छ । थानेश्वर अहिलेका चर्चित लोकगायक हुन् ।