रसुवा बाढीले नेपाल-चीन आपूर्ति प्रणालीमा पूर्ण अवरोध : चेम्बर

२५ असार, काठमाडौं । नेपाल–चीन सीमामा रहेको प्रमुख नाका रसुवागढीको टिमुरे क्षेत्र भएर मंगलबार आएको भीषण वर्षाले मानवीय र भौतिक रुपमा ठूलो क्षति बेहोर्नुपरेको नेपाल चेम्बर अफ कमर्सले जनाएको छ ।

भारी वर्षासँगै आएको बाढीले नेपाल–चीनमैत्री पुल पूर्णरूपमा बगाएको र रसुवागढी नाकाबाट चीनसँग हुने व्यापारको मुख्य नाका बन्द हुँदा व्यवसायी मर्कामा परेको चेम्बरले उल्लेख गरेको छ ।

मालसामान लिएर नेपालतर्फ आउँदै गरेका सयौँ कन्टेनर सवारीसाधन बाढीले बगाउँदा व्यापार–व्यवसायमा गम्भीर क्षति भएको चेम्बरद्वारा जारी विज्ञप्तिमा छ ।

‘गत मंगलबार आएको बाढीले मानवीय क्षतिसँगै भौतिक रूपमा पनि ठूलो क्षति गरेको छ । त्यस क्षेत्रमा हराइरहेकाहरूको खोजीका साथै भौतिक पूर्वाधार निर्माणलाई तीव्रता दिएर महत्त्वपूर्ण व्यापारिक मार्ग तत्काल सुचारु गर्न सरकारसँग आग्रह गर्दछौं,’ विज्ञप्तिमा छ ।

रसुवागढीको टिमुरे क्षेत्रमा तत्कालीन राहत व्यवस्थासँगै दीर्घकालीन संरचना निर्माण, वैकल्पिक पुल निर्माण तथा प्राविधिक पूर्वतयारी गर्न समेत चेम्बरले सरकारको ध्यानाकर्षण गराएको छ ।

चीनसँगको महत्त्वपूर्ण व्यापारिक नाका नाका बन्द हुँदा आयात–निर्यातमा ठूलो असर पर्न सक्ने भन्दै चेम्बरले यस्ता जोखिमपूर्ण अवस्थाको दीर्घकालीन समाधानका लागि स्थायी संरचना र वैकल्पिक नाका व्यवस्थापनमा नीतिगत निर्णय गर्न सरकारसँग आग्रह गरेको छ ।