कैलालीमा २२६ कैदीबन्दी कारागार फर्किए

News Summary

Generated by OK AI. Editorially reviewed.

कैलाली कारागारबाट भागेका २२६ जना कैदीबन्दी फर्किएका छन् भने अझैँ ४४१ जना कारागार बाहिर रहेका छन्।
कारागार प्रमुख चिरञ्जीवी सापकोटाले केही कैदीबन्दी भागेको भोलिपल्टै सम्पर्कमा आएको र केही पक्राउ परेको बताए।
कारागार व्यवस्थापन विभागले कैदीबन्दीलाई फर्कन आह्वान गरेको र प्रहरीले खोजीकार्य जारी राखेको छ।

१ असोज, कैलाली। कैलाली कारागारबाट भागेका २२६ जना कैदीबन्दी कारागार फर्किएका छन् ।

गत भदौ २४ गते ‘जेनजी’ पुस्ताको प्रदर्शनका क्रममा कारगारबाट भागेका कैदीबन्दी फर्किएका हुन्।

हालसम्म २७ महिला र १९९ पुरुष कैदीबन्दी कारागार फर्र्किएका जिल्ला कारागार कार्यालयका प्रमुख चिरञ्जीवी सापकोटाले जानकारी दिए ।

उनले केही कैदबन्दी भागेको भोलिपल्ट नै सम्पर्कमा आएका बताए ।

फर्किएकामध्ये अधिकांश आफैँ सम्पर्कमा आएका र केहीलाई प्रहरीले टीकापुर क्षेत्रबाट पक्राउ गरी बुझाएको उल्लेख गर्दै उनले कैदीबन्दी फर्कने क्रम जारी रहेको बताए।

उनले भने, ‘कारागार व्यवस्थापन विभागले पनि कैदीबन्दीलाई कारागार फर्कन आह्वान गरेको छ । हामीले पनि सूचना जारी गरेका छौँ । प्रहरीले पनि खोजीकार्य जारी राखेको छ । छिट्टै सबै कैदीबन्दी फर्किने विश्वास छ।’

कैलाली कारागारमा ५८ महिलासहित ६६७ जना कैदीबन्दी रहेका थिए । ‘जेनजी’ पुस्ताको प्रदर्शनका क्रममा ६६६ कैदीबन्दी भागेका कारागार प्रशासनले जनाएको छ । अझैँ ४४१ जना कैदीबन्दी कारागार बाहिर रहेका प्रमुख सापकोटाले जानकारी दिए।