‘कमेडी नाइट विथ च्याम्पियन्स’को अध्यक्षमा माग्ने बुढा, दीपाश्रीको ठाउँमा आए

News Summary

Generated by OK AI. Editorially reviewed.

टेलिभिजन शो ‘कमेडी नाइट विथ च्याम्पियन्स’ को २८ औं एपिसोडमा तिहार विशेष प्रस्तुति आउने मंगलबार प्रसारण हुनेछ।
फिल्म ‘सोल्टिनी’का कलाकार प्रकाश सपुत र परीक्षा लिम्बुले शोमा कमेडियनसँग देउसी भैली खेलेको प्रस्तुति समावेश छ।
चर्चित कलाकार केदारप्रसाद घिमिरे ‘माग्ने बुढा’ अध्यक्ष बनेर दुई एपिसोडसम्म शोमा देखिनेछन्, दीपाश्री निरौला अमेरिका भ्रमणमा भएकाले।

काठमाडौं । टेलिभिजन शो ‘कमेडी नाइट विथ च्याम्पियन्स’ हरेक मंगलबार दर्शकमाझ आउँछ । पाहुना बोलाएर विभिन्न सन्दर्भमा हुने हाँस्यब्यंग्यको कारण शो चर्चित छ ।

यस्तोमा, आउने मंगलबार प्रसारण हुने २८ औं एपिसोडमा दर्शकले तिहार विशेष प्रस्तुति हुने पाउनेछन् ।

प्रदर्शन तयारीमा रहेको फिल्म ‘सोल्टिनी’का कलाकार प्रकाश सपुत र परीक्षा लिम्बुले कमेडियनसँग देउसी भैली खेलेको प्रस्तुति यो एपिसोडमा समावेश छ ।

दर्शकलाई योभन्दा पनि नयाँ कुरा छ । चर्चित कलाकार केदारप्रसाद घिमिरे ‘माग्ने बुढा’ अध्यक्ष बनेर शोमा देखिनेछन् । दीपाश्री निरौला केही समय अमेरिका भ्रमणमा रहेकाले उनको ठाउँमा माग्ने बुढा अध्यक्षको रुपमा देखिएको निर्देशक विशाल भण्डारीले जनाए ।

‘छक्कापञ्जा कमेडी टूर’को सिलसिलामा अमेरिका टूरमा रहेकी दीपाश्री दुई सातापछि स्वदेश फर्किने तयारी छ । निरौला नआउँदासम्म माग्ने बुढालाई दर्शकले अध्यक्षको रुपमा शोमा देख्न पाउनेछन् ।

‘उहाँ दुई एपिसोड अध्यक्षको रुपमा देखिनुहुनेछ’ निर्देशक भण्डारीले भने, ‘सिनियर कमेडियन अध्यक्षको रुपमा आउँदा रमाइलो अनुभव भयो ।’

नयाँ एपिसोडको ट्रेलर आइतबार बेलुका आउने जनाइएको छ ।