चिच्याउँदै १० लाख ७० हजारसम्म गनेर विश्व कीर्तिमान

विश्वभरका अनौठा कीर्तिमानका लागि चिनिने गिनिज बुकमा कहिलेकाहीँ निकै अचम्मका कीर्तिमानहरू दर्ता हुन्छन् । त्यसमध्ये नाइजेरियाली युवती फेबर ओगेजी एनीले बनाएको नयाँ कीर्तिमानलाई सबैभन्दा अनौठो र कठिनमध्येको एक मानिएको छ।

एनीले लगातार ७० दिनसम्म आवाज निकालेर अंकको गिन्ती गर्दै १० लाख ७० हजार सम्म पुगिन् र विश्व कीर्तिमान कायम गरिन्। घरभित्रै बसेर उनले त्यो काम सन् २०२५ अक्टोबर ८ देखि सुरु गरेर लगातार अभ्यासपछि पूरा गरेकी हुन्।

ठूलो स्वरमा बोलेर अंकको गणना गर्नु सामान्य कामजस्तो लाग्न सक्छ । तर दिनमा करिब १४ घण्टा अनि लगातार ७० दिनसम्म एउटै काम दोहोर्‍याउँदै गन्नु सजिलो कुरा होइन । यस्तो पट्यार लाग्दो कामले धेरैलाई थकित वा मानसिक रूपमा दबाबमा पार्न सक्छ ।

तर फेभरका अनुसार उनलाई गन्ने कामप्रतिको रुचि र नयाँ कीर्तिमान बनाउने दृढ इच्छाले निरन्तर अघि बढ्न प्रेरित गर्‍यो ।

उनले भनेकी छिन्- साँचै भन्नुपर्दा यो निकै कठिन थियो । तर गन्ने कामप्रतिको मेरो लगावले मलाई अघि बढाइरह्यो। मेरो टिमले निरन्तर साथ दियो र हौस्यायो । त्यसैले चुनौतिपूर्ण भए पनि यो यात्रा रमाइलो बन्यो।

फेभरले आफ्नो दैनिक गणनाको प्रक्रिया युट्युबमा लाइभ स्ट्रिम गर्दै गइन् । लाइभ हेर्ने दर्शकहरूको हौसला र समर्थनले पनि उनलाई थप ऊर्जा दियो । अन्ततः उनले डिसेम्बर १६ सम्ममा अंकको गिन्ती १० लाख ७० हजारको लक्ष्य पूरा गरिन् । त्यो सँगै उनले १८ वर्ष पुरानो रेकर्ड पनि तोडिन् ।

यसअघि यसरी आवाज निकालेर अंक गणना गर्ने कीर्तिमान १० लाखको थियो । तर फेभरले भने १० लाख ७० हजारसम्म गनेर नयाँ रेकर्ड कायम गरिन्।

रेकर्ड पूरा भएको अन्तिम क्षण सम्झँदै उनले भनेकी छिन्- अन्तिम दिन निकै भावुक थियो । अन्तिम संख्या उच्चारण गर्दा एकैसाथ राहत र खुसीको अनुभूति भयो । त्यो क्षण असाधारण थियो, किनकि मैले केही अनौठो र अद्वितीय उपलब्धि हासिल गरेकी थिएँ ।

जीवनमा केही फरक र असाधारण गर्ने चाहनाले आफूलाई त्यो चुनौती लिन प्रेरित गरेको उनले बताएकी छिन् ।

एजेन्सी