फ्रान्सले दुई इरानी कूटनीतिज्ञलाई देश निकाला गर्ने

३ भदौ, काठमाडौं । फ्रान्सले दुई इरानी कूटनीतिज्ञलाई देशनिकाला गर्ने निर्णय गरेको छ । फ्रान्सेली विदेशमन्त्री जाँ–नोएल बारोले मंगलबार सामाजिक सञ्जाल ‘एक्स’मार्फत आगामी केही दिनमा फ्रान्समा रहेका दुई इरानी कूटनीतिज्ञलाई निष्कासन गरिने जानकारी दिएका हुन् ।

यो निर्णय गत जुलाईमा तेहरानस्थित फ्रान्सेली दूतावासका दुई कर्मचारीलाई इरानी सुरक्षा अधिकारीहरूले पक्राउ गरी सोधपुछ तथा धम्की दिएको घटनाको प्रतिक्रियास्वरूप आएको हो । फ्रान्सले उक्त घटनालाई कूटनीतिक प्रतिरक्षाको उल्लंघन र ‘अत्यन्त गम्भीर तथा पूर्वनियोजित’ घटना भनेको थियो ।

यसअघि इरानले पनि फ्रान्सेली दूतावासका ती दुई कर्मचारीलाई पुन: इरान फर्कन अनुमति नदिने निर्णय गरेको थियो । इरानी विदेश मन्त्रालयका प्रवक्ता इस्माइल बकाईले उनीहरूले कूटनीतिक सम्बन्धसम्बन्धी भियना महासन्धिको उल्लंघन गर्दै इरानी नागरिक समाजलाई समर्थन गर्ने गतिविधिमा संलग्न भएको आरोप लगाएका थिए ।

फ्रान्सेली विदेश मन्त्रालयले भने इरानको आरोपलाई अस्वीकार गर्दै आफ्ना कर्मचारीमाथि लगाइएका आरोप ‘पूर्ण रूपमा झुटा’ भएको जनाएको छ । फ्रान्सका अनुसार ती कर्मचारीहरूले विद्यार्थी, कलाकार तथा वैज्ञानिकसहित इरानी नागरिक समाजलाई सहयोग गर्ने कार्यक्रम सञ्चालन गरिरहेका थिए ।

जुलाई २० मा विदेशमन्त्री बारोले इरानी सुरक्षा निकायले दुई फ्रान्सेली कर्मचारीलाई केही घण्टा नियन्त्रणमा राखेर सोधपुछ गरेको र तीमध्ये एक जनामाथि शारीरिक दुर्व्यवहारसमेत भएको बताएका थिए । त्यसबेला उनले घटनाको परिणाम भोग्नुपर्ने चेतावनी दिएका थिए ।

फ्रान्स र इरानबीच पछिल्लो समय बढिरहेको तनावका बीच कूटनीतिज्ञ निष्कासनको यो निर्णयले दुई देशबीचको सम्बन्ध थप तनावपूर्ण बन्ने संकेत गरेको छ ।