२०८३ भदौ १८ गते २०:०९ 
News Summary
Generated by OK AI. Editorially reviewed.- एनएसजेएफ स्पोर्ट्स अवार्डमा बक्सिङका चन्द्रबहादुर थापा वर्ष उत्कृष्ट पुरुष खेलाडी र करातेकी एरिका गुरुङ वर्ष उत्कृष्ट महिला खेलाडी घोषित भएका छन्।
- एरिकाले लगातार तेस्रो पटक उत्कृष्ट महिला खेलाडीको अवार्ड जित्दै यो उपलब्धि हासिल गर्ने पहिलो खेलाडी बनेकी छन्।
- भलिबलकी मिना सुनारले २९.०४ प्रतिशत मतसहित पिपल्स च्वाइस अवार्ड जितेकी छन्, भने कराते प्रशिक्षक कुशल श्रेष्ठ उत्कृष्ट प्रशिक्षक बनेका छन्।
१८ भदौ, काठमाडौं । नेपाल खेलकुद पत्रकार मञ्च (एनएसजेएफ) को आयोजनामा भएको २३औं एनएसजेएफ पल्सर स्पोर्ट्स अवार्डमा बक्सिङका चन्द्रबहादुर थापा र करातेकी एरिका गुरुङ वर्षको उत्कृष्ट खेलाडी घोषित भएका छन् । चन्द्र बहादुर वर्ष उत्कृष्ट पुरुष खेलाडी तथा एरिका वर्ष उत्कृष्ट महिला खेलाडी घोषित भएका हुन् ।
एरिकाले लगातार तेस्रो पटक उत्कृष्ट महिला खेलाडीको अवार्ड जित्दै नयाँ इतिहास रचेकी छन् । लगातार तीन पटक यो अवार्ड जित्ने उनी पहिलो खेलाडी बनेकी हुन् ।
पिपल्स च्वाइस अवार्ड भलिबलकी मिना सुनारले जितेकी छन् । उनले रवीन्द्र ढाँट, सानुमाया थिङ, पूजा राना र शेर मल्ललाई पछि पार्दै २९.०४ प्रतिशत मत प्राप्त गरिन् । रवीन्द्रले २४.५३ प्रतिशत मत पाएका थिए ।
उत्कृष्ट प्रशिक्षकको अवार्ड कराते प्रशिक्षक कुशल श्रेष्ठलाई प्रदान गरिएको छ । एसियाली खेलकुदमा ऐतिहासिक पदक विजेता एरिका गुरुङका प्रशिक्षक श्रेष्ठले रेहान जाबेद, मनीषा कुमारी बोहोरा, सबिना श्रेष्ठ र पुष्पका लामालाई पनि अन्तर्राष्ट्रिय प्रतियोगितामा पदक दिलाउने प्रशिक्षकका रूपमा योगदान दिएका छन् ।
लाइफटाइम अचिभमेन्ट अवार्ड पूर्व राष्ट्रिय ब्याडमिन्टन खेलाडी कुमार मोहन बहादुर शाहीलाई प्रदान गरिएको छ । उनलाई नेपाली ब्याडमिन्टनमा दीर्घकालीन योगदानको सम्मानस्वरूप उक्त अवार्ड प्रदान गरिएको हो ।
उत्कृष्ट पारा खेलाडीको अवार्ड ब्लाइन्ड महिला क्रिकेट टोलीकी सुस्मा तामाङले प्राप्त गरेकी छन् ।
कराते खेलाडी मनीषा कुमारी बोहोराले उत्कृष्ट युवा खेलाडीको अवार्ड जितेकी छन् । उनी २३औँ क्याडेट, जुनियर तथा यू–२१ कराते च्याम्पियनसिपकी कांस्य पदक विजेता तथा नवौँ दक्षिण एसियाली कराते च्याम्पियनसिप र ५६औँ राष्ट्रिय कराते च्याम्पियनसिपकी स्वर्ण पदक विजेता हुन् ।
त्यसैगरी, बालाजु कराते डोजोका सञ्चालक, कराते प्रशिक्षक तथा कराते रेफ्री ध्रुव बिक्रम मल्ललाई विशेष अवार्ड प्रदान गरिएको छ ।
तस्वीरहरू : विकास श्रेष्ठ
चन्द्रबहादुर थापाका दाई भुपेन्द्र थापा अवार्ड ग्रहण गर्दै
मोहन बहादुर शाही
मिना सुनार
कुशल श्रेष्ठ
सुस्मा तामाङ
मनीषा कुमारी बोहरा
प्रतिक्रिया 4