२०८३ असोज १४ गते २२:५९ 
१४ असोज, काठमाडौं । भारतीय कप्तान शुभमन गिलले वेस्ट इन्डिजविरुद्धको दोस्रो एकदिवसीय खेलमा दोहोरो शतक प्रहार गर्दै एकै खेलमा थुप्रै कीर्तिमान बनाएका छन् ।
गुवाहाटीस्थित बरसापारा स्टेडियममा बुधबार भएको खेलमा गिलले ११७ बलमा दोहोरो शतक पूरा गरे । उनले ६२ बलमा शतक पूरा गरेका थिए । गिलको दोहोरो शतकको मद्दतमा भारतले ४०६ रनको लक्ष्य पूरा गर्दै वेस्ट इन्डिजविरुद्ध शृङ्खला जितेको छ ।
गिलले यस क्रममा रोहित शर्मासँग २५५ रनको ओपनिङ साझेदारी गरेका थिए । रोहितले १०१ रन बनाए ।
भारतको कीर्तिमानी जितका क्रममा कप्तान गिलले बनाएका प्रमुख कीर्तिमान यस्ता छन् ।
लक्ष्य पछ्याउँदा सर्वाधिक व्यक्तिगत स्कोर
गिलले २०६ रन बनाएर एकदिवसीय क्रिकेटमा लक्ष्य पछ्याउने क्रममा सर्वाधिक व्यक्तिगत स्कोर बनाउने कीर्तिमान आफ्नो नाममा पारे ।
यसअघि लक्ष्य पछ्याउने क्रममा दोहोरो शतक बनाउने एक मात्र खेलाडी ग्लेन म्याक्सवेल थिए, जसले २०२३ को विश्वकपमा अफगानिस्तानविरुद्ध २०१ रन बनाएका थिए ।
सबैभन्दा कम बलमा दोहोरो शतक
गिलले ११७ बलमा दोहोरो शतक पूरा गर्दै एकदिवसीय क्रिकेटमा सबैभन्दा छिटो दोहोरो शतक बनाउने कीर्तिमान बनाए । यसअघि यो कीर्तिमान भारतका इशान किशनको नाममा थियो । उनले सन् २०२३ मा बंगलादेशविरुद्ध १२५ बलमा दोहोरो शतक पूरा गरेका थिए ।
दोस्रो दोहोरो शतक
गिल एकदिवसीय क्रिकेटमा दुईपटक दोहोरो शतक बनाउने दोस्रो खेलाडी बनेका छन् । उनीभन्दा अघि भारतका रोहित शर्माले तीनपटक यो उपलब्धि हासिल गरेका छन् ।
भारतीय कप्तानका रूपमा सबैभन्दा छिटो शतक
गिलले ६२ बलमा शतक पूरा गर्दै भारतीय कप्तानका रूपमा एकदिवसीय क्रिकेटमा सबैभन्दा छिटो शतक बनाउने रोहित शर्माको कीर्तिमान तोडेका छन् । रोहितले सन् २०२३ को विश्वकपमा अफगानिस्तानविरुद्ध ६३ बलमा शतक बनाएका थिए ।
भारतमा २ हजार रन
गिलले भारतीय भूमिमा एकदिवसीय क्रिकेटमा २ हजार रन पनि पूरा गरेका छन् । उनले ३३ इनिङमा यो उपलब्धि हासिल गरे । कुनै एक देशमा २ हजार रन पूरा गर्ने यो सबैभन्दा छिटो कीर्तिमान हो ।
कप्तानका रूपमा एक शृङ्खलामा सर्वाधिक रन
गिलले तीन वा सोभन्दा कम खेलको एकदिवसीय शृङ्खलामा कप्तानका रूपमा सर्वाधिक रन बनाउने कीर्तिमान पनि बनाए । यस शृङ्खलामा उनको रनसंख्या ३३३ पुगेको छ ।
यसअघि यो कीर्तिमान जिम्बाबेका ब्रेन्डन टेलरको नाममा थियो, जसले ३१० रन बनाएका थिए ।
गिल तीन खेल वा सोभन्दा कमको शृङ्खलामा दुईपटक ३०० भन्दा बढी रन बनाउने पहिलो खेलाडीसमेत बनेका छन् । उनले यसअघि २०२३ मा न्युजिल्यान्डविरुद्धको शृङ्खलामा ३६० रन बनाएका थिए ।
प्रतिक्रिया 4