बेलायतमा गस्ती अभ्यासमा नेपाली सेनाले लगातार तेस्रो वर्ष स्वर्ण पदक जित्यो

२२ असोज, लन्डन । संयुक्त अधिराज्य (बेलायत) को वेल्स, ब्रेकनमा सञ्चालन भएको क्याम्ब्रियन पेट्रोल एक्सरसाइज (गस्ती अभ्यास) मा नेपाली सेनाको टोलीले लगातार तेस्रो वर्ष पनि स्वर्ण पदक प्राप्त गरेको छ।

३५ राष्ट्रका १३० वटा अन्तर्राष्ट्रिय टोली सहभागी उक्त अभ्यासमा नेपाली सेनाले स्वर्ण पदक प्राप्त गरेको हो। निकै कठोर मानिने यो अभ्यासमा नेपाली सेनाले सन् २०२४ देखि लगातार तीन वर्ष स्वर्ण पदक जित्न सफल भएको छ।

उक्त अभ्यास बेलायती सेनाको गस्तीसम्बन्धी प्रमुख अभ्यास मानिन्छ। यसको आयोजना मुख्यालय १६०औं (वेल्स) ब्रिगेडले गरेको हो।

टिम म्यानेजर लेफ्टिनेन्ट कर्णेल निश्चल पाठक र पेट्रोल कमान्डर लेफ्टिनेन्ट प्रवीण पाण्डेको नेतृत्वमा नेपाली सेनाको १० सदस्यीय टोली अहिले बेलायतमा छ।

पदक वितरण समारोहमा नेपाली सेनाका प्रधानसेनापति महारथी अशोकराज सिग्देलको पनि उपस्थिति थियो। नेपाली सेनाको टोलीलाई प्रधानसेनापति सिग्देलले प्रधानसेनापति पदक प्रदान गरेका थिए। साथै गोर्खा १ आरजीआर (1 RGR) का २ जना कर्मचारीलाई पनि प्रधानसेनापति पदक प्रदान गरियो।

बेलायती सेना प्रमुख जनरल सर रोली वाकरको निमन्त्रणामा प्रधानसेनापति सिग्देल १९ असोजदेखि २५ गतेसम्म बेलायतको औपचारिक भ्रमणमा छन्।

सन् १९६० देखि वार्षिक रूपमा सञ्चालन हुँदै आएको अन्तर्राष्ट्रिय स्तरको यस प्रतियोगितामा नेपाली सेनाले सन् २०१४ देखि भाग लिँदै आएको छ। यस अभ्यासमा नेपाली सेनाले बर्सेनि उत्कृष्ट प्रदर्शन गर्दै आफ्नो नाम अन्तर्राष्ट्रिय मञ्चमा स्थापित गरेको छ।

गत वर्ष पनि नेपाली सेनाले स्वर्ण पदक जितेको थियो। उक्त अभ्यासमा गत वर्ष कुल ११७ टिम (३३ देशबाट ३५ अन्तर्राष्ट्रिय टिमसमेत) सहभागी थिए। अघिल्लो वर्ष २०२४ मा पनि क्याम्ब्रियन गस्ती अभ्यासमा नेपाली सेनाले स्वर्ण पदक प्राप्त गरेको थियो। उक्त अभ्यासमा कुल १२१ टिममध्ये ३६ देशका ३८ अन्तर्राष्ट्रिय टोली सहभागी थिए। यसअघि सन् २०१७ र २०१९ मा समेत नेपाली सेनाले स्वर्ण पदक जितेको थियो।

यो अभ्यासमा मानसिक र शारीरिक चुनौती सामना गर्नुपर्ने बेलायती सेनाको भनाइ छ।

अभ्यासमा सहभागी टोलीको लडाइँ तयारी, खबर सङ्कलन, घाइते–बिरामीको व्यवस्थापनलगायतका दक्षताहरूको परीक्षण गरिन्छ। ८ चरणमा विभाजित हुने अभ्यासमा ४८ घण्टाभित्र हतियार तथा करिब ७० पाउन्ड (३२ केजी तौल) बराबरको उपकरण एवं बन्दोबस्तीका सामग्रीसहित ६० किलोमिटर दूरी पार गर्नुपर्ने हुन्छ।