मधेशको नयाँ सरकारबारे एमाले र जसपा नेपालबीच छलफल

३१ असोज, जनकपुरधाम। मधेश प्रदेशमा नयाँ सरकार गठनबारे नेकपा एमाले र जसपा नेपालबीच छलफल भएको छ ।

एमाले अध्यक्ष केपी शर्मा ओली, जसपा नेपालका अध्यक्ष उपेन्द्र यादव सहित दुवै पार्टीका नेताहरुले आज छलफल गरेका हुन् ।

छलफलमा जसपा नेपालका मधेश प्रदेश संसदीय दलका नेता सरोज कुमार यादव समेत थिए ।

जसपा नेपालकै नेतृत्वमा नयाँ सरकार गठन गर्ने गरी छलफल भएको एक नेताले बताए । ती नेताका अनुसार जसपा नेपाल संसदीय दलका नेता सरोज कुमार यादवको नेतृत्वमा नयाँ सरकार बनाउने गरी नयाँ गठबन्धन बनाउने प्रयास भइरहेको छ ।

हिजो शुक्रबार मात्रै नेकपा एमालेले नेपाली कांग्रेस नेतृत्वको मधेश सरकारबाट अलग हुँदै समर्थन फिर्ता लिएको थियो ।

एमालेसँग सहकार्य गरी सरकारमा जाने निर्णय भएको छैन : उपेन्द्र यादव

जसपा नेपालका अध्यक्ष उपेन्द्र यादवले भने एमालेसँग सहकार्य गरी सरकारमा सहभागी हुने विषयमा पार्टीले कुनै निर्णय नगरेको बताएका छन् । अध्यक्ष यादवले सामाजिक सञ्जाल फेसबुकमार्फत पार्टीले एमालेसँग सरकारमा सहभागी हुने विषयमा कुनै नीति नलिएको र कुनै समझदारीसमेत नगरेको बताएका हुन् ।

उनले पार्टीले तत्काल एमालेसँग सहकार्य गरी सरकारमा सहभागी हुने सम्भावना नरहेको पनि उल्लेख गरेका छन् ।

‘जनता समाजवादी पार्टी, नेपाल वर्तमान अवस्थामा नेकपा (एमाले)सँग सहकार्य गरी सरकारमा सहभागी हुने सम्बन्धमा न त कुनै निर्णय नै गरेको छ, न त कुनै नीति नै लिएको छ, न कसैसँग कुनै समझदारी नै गरेको छ,’ यादवले फेसबुकमा लेखेका छन्, ‘तत्काल यो सम्भव पनि नरहेको अवस्था छ ।’

मधेश प्रदेश सभामा जसपा नेपाल सबैभन्दा ठूलो दल

मधेश प्रदेश सभामा जसपा नेपाल सबैभन्दा ठूलो दल हो । उसको २७ सिट छ । दोस्रो ठूलो दल एमालेको २३ सिट छ ।  कांग्रेसको २२ र नेपाली कम्युनिस्ट पार्टी (नेकपा) को १५ सिट मात्र छ ।

कुल १०७ सिट रहेको मधेश प्रदेशसभामा सरकारको आवश्यक बहुमतका लागि ५४ सिट आवश्यक पर्छ ।