भीमफेदी दुर्घटनाका १३ जनाको शव सर्लाही आइपुग्यो, आजै सामूहिक अन्त्येष्टि गरिँदै

२७ कात्तिक, सर्लाही । मकवानपुरको भीमफेदी गाउँपालिका–६ चिसापानीगढीमा भएको विद्युतीय हायस दुर्घटनामा मृत्यु भएका सर्लाहीको चक्रघट्टा गाउँपालिका–४ सुन्दरपुरका १३ जनाको शव गाउँ ल्याइएको छ ।

बिहीबार बिहान भएको दुर्घटनामा मृत्यु भएका उनीहरूको शव पोस्टमार्टमपछि शुक्रबार साँझ सुन्दरपुर ल्याइएको हो ।

एउटै गाउँका १३ जनाको एउटै दुर्घटनामा मृत्यु भएपछि सुन्दरपुरमा सामूहिक अन्त्येष्टिको तयारी गरिएको छ । मृतक सबैको शुक्रबार राति नै एकै स्थानमा धार्मिक तथा सांस्कृतिक परम्पराअनुसार अन्तिम संस्कार गरिने मृतकका छिमेकी नितेश यादवले जानकारी दिए ।

गाउँपालिका अध्यक्ष कृष्णकुमार यादवका अनुसार मृतक १३ जनाको गाउँको पश्चिमतर्फ रहेको लखन्देही नदीमा सामूहिक अन्त्येष्टि गरिनेछ ।

मृतकका आफन्तले उचित राहत र क्षतिपूर्तिको सुनिश्चितता नभएसम्म शव नबुझ्ने अडान लिएपछि हेटौंडा अस्पतालमा शव राखिएका थिए । पीडित परिवारले मृतकका प्रत्येक परिवारलाई १० लाख रुपैयाँ क्षतिपूर्ति, परिवारका एक सदस्यलाई रोजगारी र घाइतेको सम्पूर्ण उपचार खर्च सरकारले व्यहोर्नुपर्ने माग गरेका थिए ।

सरकारले गठन गरेको दुर्घटना छानबिन समिति र पीडित परिवारबीच सहमति भएपछि आफन्तले शुक्रबार शव बुझेका हुन् । सहमतिअनुसार कानुनबमोजिम पाउने राहत तथा क्षतिपूर्ति तत्काल उपलब्ध गराउन सरकारले पहल गर्नेछ ।

थप राहत तथा क्षतिपूर्तिको व्यवस्थाका लागि जिल्ला प्रशासन कार्यालय मकवानपुरले प्रधानमन्त्री तथा मन्त्रिपरिषद्को कार्यालयमा औपचारिक आग्रह गर्ने सहमति भएको मकवानपुरका सहायक प्रमुख जिल्ला अधिकारी शेषकान्त पौडेलले बताए ।

दुर्घटनामा सुन्दरपुरका १३ जना र कविलासी नगरपालिका–८ अगर्वाका हायस चालक ३० वर्षीय रवीशङ्करकुमार मण्डल गरी १४ जनाको मृत्यु भएको थियो । दुर्घटनामा अन्य ६ जना घाइते भएका थिए ।

छठ पर्व मनाउन काठमाडौंबाट सर्लाही फर्किने क्रममा बिहीबार बिहान करिब पौने ६ बजे हायस चिसापानीगढीमा सडकबाट करिब पाँच सय मिटर तल खसेको थियो ।

एउटै गाउँका १३ जनाको मृत्यु भएपछि चक्रघट्टा गाउँपालिकाले शुक्रबार शोक बिदा दिएको थियो । गाउँपालिकाले मृतक परिवारलाई जनही ५० हजार रुपैयाँ र मधेस प्रदेश सरकारले प्रत्येक मृतक परिवारलाई एक लाख रुपैयाँ राहत उपलब्ध गराउने निर्णय गरेका छन् ।