शेयर बजार र कर

कुनै व्यक्तिगत वा संस्थागत लगानीकर्ता वा व्यवसायीले आय वर्ष अनुरूप तिर्नुबुझाउनुपर्ने आयबापतको कर रकम, सोको विवरण, वित्तीय विवरण राजस्व कार्यालयमा दाखिला गरिसकेपछि करदाताको मागबमोजिम राजस्व कार्यालयले लगानीकर्ता वा व्यवसायीलाई अघिल्लो आर्थिक वर्षको कर तिरिसकेको भनेर प्रदान गर्ने प्रमाणपत्रलाई कर चुक्ता प्रमाणपत्र भनिन्छ ।

कर चुक्ता प्रमाणपत्र लिनका लागि ऐन बमोजिम आय विवरण पेस गरी तिर्नुपर्ने सम्पूर्ण कर तिरिसकेपछि आवश्यक कागजात सहित सम्बन्धित राजस्व कार्यालयमा निवेदन दिनुपर्छ ।

कर चुक्ता प्रमाणपत्र लिन शुल्क लाग्दैन तर दाखिला गर्नुपर्ने कर बाँकी रहनुहुँदैन ।

राष्ट्र बैंकले कर तिरेपछिको आम्दानीको ५० प्रतिशत रकमभित्र ईएमआई पर्ने गरी ऋण दिने व्यवस्था गरेको छ । यसअघि यस्तो व्यवस्था थिएन ।

कर चुक्ता प्रमाणपत्र विभिन्न सरकारी प्रयोजन, बैंक, वित्तीय तथा बीमा कम्पनी वा ब्रोकर कम्पनी वा मर्चेन्ट बैंकिङ कम्पनीको संस्थापक शेयरधनी बन्न, सूचीकृत कम्पनीको सञ्चालक बन्नको लागि अनिवार्य छ । यसबाहेक वर्षभरि गरेको आम्दानी बापत सरकारलाई तिरेको कर बापतको प्रमाणपत्र रहेको हुँदा यसलाई लगानीकर्ताहरूले आफ्नो कर कार्यालयबाट प्राप्त गरेको हुनुपर्दछ ।

अझ संस्थागत लगानीकर्ताहरूको लागि त बैंक खाता खोल्न, ऋण लिन लगायत कार्यका लागि समेत अनिवार्य रूपमा कर तिरेको प्रमाणपत्र आवश्यक हुने भएकोले कर चुक्ता प्रमाणपत्र अनिवार्य रूपमा लिएको हुनुपर्दछ ।

कर चुक्ता प्रमाणपत्र लिन आवश्यक कागजपत्र

• करदाताले व्यहोरा खुलाई रु. १० को टिकट टाँसेर नजिकको आन्तरिक राजस्व कार्यालयमा निवेदन दिनुपर्छ ।
• आय विवरण पेस गर्नुपर्ने हकमा आय विवरण पेस गरी निर्धारित कर दाखिला गरिसकेको हुनुपर्छ ।
• विगत आर्थिक वर्षहरूको आय विवरण र कर बक्यौता नभएको हुनुपर्छ ।
• वित्तीय विवरण पेस गर्नुपर्ने करदाताको हकमा वित्तीय विवरण र लाग्ने कर वापतको रकम तिरेको भौचर बुझाउनुपर्छ ।
• रोजगारी आय हुनेको सम्बन्धमा रोजगारदाताबाट आम्दानी र कर दाखिला गरेको विवरण ल्याएर पेस गर्नुपर्छ ।
• अन्य कुराको हकमा आन्तरिक राजस्व कार्यालयबाट तोकिए बमोजिमको विवरणहरू पेस गर्नुपर्ने हुनसक्छ ।