यो साता बैंकिङ र हाइड्रोपावरमा आकर्षण, ३४ अंक बढ्यो बजार

१२ पुस, काठमाडौं । यो साता सेयर बजार १.३ प्रतिशत बढेको छ । गत साता २५९६ अंकमा रहेको बजार यो साता ३४ अंक बढेर २६३० अंकमा पुग्यो ।

पहिलो दिन आइतबार १३.५३ अंक घटेको बजार सोमबार २८.९१ अंक बढ्यो । मंगलबार १४.११ अंक बढेको बजार बुधबार सार्वजनिक विदाका कारण बन्द रह्यो । अन्तिम दिन बिहीबार ४.१९ अंक बढ्यो ।

आइतबार ४ अर्ब ५१ करोडको कारोबार भएकोमा सोमबार ४ अर्ब ४३ करोड, मंगलबार ५ अर्ब २० करोड र बिहीबर ५ अर्ब ३२ करोडको कारोबार भयो ।

यो साता हाइक्याप सेक्टरमा आकर्षण देखियो । बैंकिङ र हाइड्रोपावर सेक्टर सबैभन्दा धेरै बढे । हाइड्रोपावर २.७ तथा बैंकिङ २.५ प्रतिशत बढे । हाइ क्याप सेक्टर बढेका कारण बजार वृद्धिमा बलियो आधार देखिन्छ ।  बैंकिङ र हाइड्रोपावर बजारका सबैभन्दा शक्तिशाली सेक्टर हुन् ।

यो साता बजारमा समूहगत उतारचढाव

कसले धेरै कमाए, कसले गुमाए ?
यो साता मूल्य सबैभन्दा धेरै बढ्ने कम्पनीमा सुपर मादी हाइड्रोपावर, न्यादी हाइड्रोपावर, गुराँस लघुवित्त वित्तीय संस्था, सपोर्ट माइक्रोफाइनान्स, आत्मनिर्भर लघुवित्त, उपकार लघुवित्त, राप्ति हाइड्रो एण्ड जनरल कन्स्ट्रक्सन, बाराही हाइड्रोपावर र रिभर फल्स पावर क्रमशः अगाडि रहे ।

सुपर मादीको २५.४, न्यादीको २०.१, गुराँसको २०, सपोर्टको १९.७, आत्मनिर्भरको १६.४, उपकारको १४.९, राप्तिको १४.६, बाराहीको १२.५ तथा रिभरफल्सको १२.१ प्रतिशत मूल्य बढ्यो ।

यो साता धेरै मूल्य घट्नेमा अधिकांश विकास बैंक कम्पनी रहे । नारायणी डेभलपमेन्टको ११.११, कर्पोरेट डेभलपमेन्टको १०.५८, सप्तकोशी विकास बैंकको १०.११, सिन्धु विकास बैंकको ६.१७, मायाखोला हाइड्रोपावरको ५.७५, नेपाल फाइनान्सको ४.९१ तथा मानुसी लघुवित्तको ४.३६ प्रतिशत मूल्य घट्यो ।