‘दक्षिण एसियाली सम्पदा सम्मेलन’ गर्ने गरी काठमाडौं सम्पदा सम्मेलनको पाँच बुँदे घोषणापत्र जारी

२१ पुस, काठमाडौं। शहीद गंगालाल फाउन्डेनसनले आयोजना गरेको ‘काठमाडौं सम्पदा सम्मेलन २०२५’ ले पाँच बुँदे घोषणापत्र जारी गरेको छ ।

लुम्बिनी बौद्ध विश्वविद्यालयको सहकार्यमा फाउन्डेसनले आयोजना गरेको सम्मेलनले पाँच बुँदे घोषणापत्र जारी गरेको फाउन्डेसनका अध्यक्ष प्रशान्त श्रेष्ठले जानकारी दिए ।

उनका अनुसार पर्यटन, बौद्ध शिक्षा अगाडि बढाउन, विद्वानहरूको योगदान र वैश्विक परिवर्तन प्रेरित गर्नका लागि आध्यात्मिक मार्गबाट समग्र जीवनमा सामूहिक समर्पणको आवश्यकता रहेको छ ।

त्यस्तै नेपालको आध्यात्मिक, सांस्कृतिक र स्थापित विरासत संरक्षण गर्न र यसलाई अगाडि बढाउनका लागि मिलारेपाका पवित्र गुफा र आध्यात्मिक पर्यटन र त्यसको क्षमता, वास्तुकलाको स्थापित महत्त्व र चोरी भएका सांस्कृतिक कलाकृति फिर्ता गराउन फाउन्डेसन प्रतिबद्ध रहेको घोषणापत्रमा उल्लेख छ ।

काठमाडौंको ऐतिहासिक पहिचान, बज्रयान चर्यागीता र चर्यानृत्यको समृद्ध परम्परा, कीर्तिपुरको बौद्ध वास्तुकला र साहित्य लगायत नेपालका मूर्त र अमूर्त सांस्कृति सम्पदाको विरासत संरक्षण र पुनर्जीवनका लागि प्रतिबद्धता घोषणापत्रमा जनाइएको छ ।

घोषणापत्र अनुसार भूकम्पपछि पाटनको जीर्णोद्धारमा परम्परागत शिल्प कौशल, लोकेश्वर पूजामा जोडिएको तर हराउँदै गएको उपोसोधा व्रत परम्परा जसमा स्थानीय नेवार कालिगढहरूको उत्कृष्ट कला समेटिएका छन्, तिनलाई संरक्षण र बढावा दिई भविष्यका पिढीलाई सांस्कृतिक र धार्मिक महत्त्व बुझाइराख्न निरन्तर काम गरिने छ ।

त्यसैगरी दक्षिण एसियाको समृद्ध सांस्कृतिक, ऐतिहासिक र सामाजिक विविधता पहिचान गरी भविष्यका पिढीका लागि यसको संरक्षण र सम्बद्र्धन गर्न फाउन्डेसनले निकट भविष्यमा ‘दक्षिण एसियाली सम्पदा सम्मेलन’ आयोजना गर्ने घोषणा गरिएको छ ।