२०८१ माघ १० गते १७:०२ 
१० माघ, काठमाडौं । चर्च ब्वाइज युनाइटेडलाई पराजित गर्दै संकटा एफसी सभापति कप फुटबल २०८१ को सेमिफाइनलमा प्रवेश गरेको छ ।
त्रिपुरेश्वरस्थित दशरथ रंगशालामा बिहीबार भएको पहिलो खेलमा काठमाडौंको संकटाले ए डिभिजन लिग च्याम्पियन चर्च ब्वाइजलाई ३-० ले पराजित गरेको हो ।संकटाका लागि अबेका रिचर्डले दुई तथा चन्दन दासले एक गोल गरे ।
खेलको २१औं मिनेटमा अबेकाले गोल गर्दै संकटालाई अग्रता दिलाएका थिए । पहिलो हाफमा एक गोल गरेको संकटाले दोस्रो हाफमा दुई गोल थप्यो । ७०औं मिनेटमा अबेकाले व्यक्तिगत दोस्रो गोल गर्दै संकटाको अग्रता दोब्बर पारे । दुई मिनेटपछि नै चन्दस दासले गोल गरेपछि संकटाले ३-० को अग्रता बनायो ।
राष्ट्रिय टिमका खेलाडीहरु रहेको चर्च ब्वाइजले पनि गोल गर्ने अवसर बनाएपनि फिनिसिङ हुन सकेन । चर्च ब्वाइजका फरवार्ड समीर तामाङले गोल गर्ने दुई अवसर सदुपयोग गर्न सकेनन् ।
संकटाले अब मछिन्द्र क्लब र नेपाल एपीएफ क्लबबीचको विजेतासँग सेमिफाइनल खेल्नेछ । मछिन्द्र र एपीएफबीच शुक्रबार खेल हुनेछ ।
नेपाली कांग्रेसको भातृ संस्था नेपाल लोकतान्त्रिक खेलकुद संघ महाधिवेशन निर्देशन समितिको आयोजनामा भएको सभापति कपमा ८ टोलीको सहभागिता छ ।
प्रतिक्रिया 4