२०८१ माघ ११ गते ८:११ 
११ माघ, काठमाडौं । आईसीसी यू-१९ महिला टी-२० विश्वकप २०२५ को समूह चरणबाट अघि बढ्न नसकेको नेपालले आज प्लेअफ खेल खेल्दै छ । नेपालले समूह ए बाट बाहिरिएको मलेसियासँग प्लेअफमा खेल्न लागेको हो ।
नेपाल र मलेसियाबीचको खेल मलेसियाको जोहोरस्थित जोहोर एकेडेमी क्रिकेट ओभलमा दिउँसो नेपाली समयअनुसार सवा १२ बजेदेखि सुरू हुनेछ । नेपालको कप्तानमा पुजा महतो तथा मलेसियाको कप्तानमा नुर दानिया सुहादा छन् ।
नेपालले समूह चरणमा बंगलादेश, स्कटल्याण्ड र अस्ट्रेलियासँग हार व्यहोरेको थियो । तीनवटै खेलमा पराजित भएपछि नेपाल सुपर सिक्समा पुग्न सकेन ।
उता मलेसिया भने तीनवटा टेस्ट राष्ट्र भारत, श्रीलंका र वेस्ट इन्डिज रहेको समूहमा परेको थियो । मलेसिया तीनवटै खेलमा पराजित हुँदै सुपर सिक्समा पुग्न सकेन ।
पहिलोपटक विश्वकप खेलेको मलेसिया आयोजक टोली भएकाले सिधै विश्वकपमा स्थान बनाएको थियो । नेपालले एसिया छनोट जितेर विश्वकपमा प्रवेश गरेको थियो ।
आजै विहान हुने अर्को प्लेअफ खेलमा पाकिस्तान र सामोआ खेल्ने छन् । समूह चरणमा जितविहीन रहेका चारवटै टोलीलाई घर फर्कनुअघि सान्त्वना जित निकाल्ने अवसर छ ।
समूह चरणमा मलेसियाको नेपालभन्दा कमजोर प्रदर्शन देखिएको थियो । त्यसकारण नेपालको जितको सम्भावना बढी देखिन्छ ।
आजका खेलहरू :
पाकिस्तान यू-१९ महिला भर्सेस् सामोआ यू-१९ महिला : विहान ८:१५
मलेसिया यू-१९ महिला भर्सेस् नेपाल यू-१९ महिला : दिउँसो १२:१५
प्रतिक्रिया 4