मुलुकलाई जोखिमपूर्ण सूचीबाट जोगाउन प्रयासहरू भइरहेका छन् : महान्यायाधीवक्ता बडाल

११ माघ, काठमाडौं।  महान्यायाधीवक्ता रमेश बडालले नेपाललाई सम्पत्ति शुद्धीकरणको जोखिमपूर्ण मुलुकको सूचीमा पर्नबाट जोगाउन विभिन्न प्रयासहरु भएको बताएका छन् ।

शुक्रबार महान्यायाधीवक्ता कार्यालयले आयोजना गरेको कार्यक्रममा बोल्‍दै महान्यायाधीवक्ता बडालले गतवर्ष कानून संशोधन भएपछि सम्पत्ति शुद्धीकरणको अनुसन्धानको दायरा फराकिलो भएको बताउँदै आगामी दिनमा त्यसको नतिजा देखिने बताए ।

उनले  विभिन्न ३९ वटा कसुरहरुबाट सम्पत्ति जोडेको भेटिए सम्पत्ति शुद्धीकरणको कसुर आकर्षित हुने र प्रहरीले अनुसन्धान गर्न पाउने व्यवस्था थपिएको बताए ।

‘तर प्रहरीलाई झोक चल्नासाथ जसलाई पनि मुद्दा चलाउछ भन्ने भ्रम चलेको छ, त्यो गलत हो’ सम्वद्ध कसुरबाट धन कमाएको देखिएमा मात्रै मुद्दा चल्ने हो । त्यसमा पनि जोखिमपूर्ण क्षेत्रमा मात्रै अनुसन्धान केन्द्रित गर्ने नीति बनेको छ।’  उनले भने ।

सरकारले राष्ट्रिय परिचयपत्र प्रणालीलाई विभिन्न सेवासँग आवद्ध गर्न खोजेको उल्लेख गर्दै उनले त्यसबाट कर छली र अपराधको पहिचानमा सहज हुने बताए ।

नायव महान्यायाधीवक्ता सञ्जिवराज रेग्मीका अनुसार सम्पत्ति शुद्धीकरण अन्य अपराधको सहउत्पादन भएकाले त्यसको नियन्त्रणका लागि गतवर्ष कानून परिमार्जन भएको बताए ।

नेपाल सम्पत्ति शुद्धीकरणका दृष्टिकोणले जोखिमपूर्ण सूचीमा पर्ने त्रास रहेको उल्लेख गर्दै उनले अहिले पनि त्यसलाई रोक्न प्रयासहरु भइरहेको बताए ।

सहन्यायाधीवक्ता दिपशिखा मुनकर्मीले सम्पत्ति शुद्धीकरण अनुसन्धान विभागमा सीमित रहेको मुद्दा दायर गर्ने अधिकार अहिले विभिन्न निकायहरुमा विस्तार भएको बताइन् । उनका अनुसार अहिले तीन ढंगले अनुसन्धानको काम अघि बढ्नसक्छ ।

पहिलो, आतंकवाद तथा संगठित अपराधमा हुने वित्तीय लगानीमाथि प्रहरीले सोझै अनुसन्धान गर्नसक्ने कानूनी व्यवस्था छ । दोस्रो, कुनै अपराधको अनुसन्धान हुँदै गर्दा त्यसबाट शंकास्पद मानिसले सम्पत्ति समेत आर्जन गरेको भेटिए सम्पत्ति शुद्धीकरणको मुद्दा चल्नसक्छ ।

तेस्रो, कुनै व्यक्तिको साथमा अस्वभाविक सम्पत्ति भेटियो, तर उमाथि अरु कुनै अपराधमा संलग्न भएको आरोप छैन भने अपराधबाट धन कमाएको शंकामा सम्पत्ति शुद्धीकरण अनुसन्धान विभागले अनुसन्धान गर्न सक्छ ।

‘नियमनकारी निकाय र सूचक संस्थाहरुले अबैध धन ओसारपसार र व्यवस्थापनको सूचना दिएमा अनुसन्धान गर्न अझै सहज हुने देखिन्छ’ उनले भनिन्, ‘नेपाल राष्ट्र बैंकको वित्तिय जानकारी इकाईले पनि शंकास्पद धनको कारोवारको सूचना संकलन गरिरहेको छ । विभिन्न क्षेत्रबाट भइरहेको प्रयासले एउटा नतिजा देखिनसक्छ ।’