पेटको मात्रै होइन घाँटीमा पनि हुन्छ ग्यास्ट्रिक, कसरी थाहा पाउने ?

१७ माघ, काठमाडौं । हामीलाई लाग्छ, ग्यास्ट्रिक भन्नेबित्तिकै त्यो पेटको रोग हो, यसले पेटमा मात्रै समस्या देखाउँछ। पेटको मात्रै नभई घाँटीको पनि ग्यास्ट्रिक हुन्छ भन्ने कुरा धेरैलाई थाहा हुँदैन । घाँटीको ग्यास्ट्रिकका लक्षणहरूको अनुभव धेरैले गरिरहेका हुन्छन् । यो समस्याबारे ज्ञान नहुँदा यस्ता लक्षण देखा परेपछि बिरामीले अन्य रोगसँग जोडिरहेका हुन्छन् । घाँटीमा मात्रै छुट्टै हुने भन्दा पनि पेटको ग्यास्ट्रिक बढेर घाँटीमा असर गर्ने हो ।

कस्ता लक्षण देखिन्छन् ?

मुख्य गरी यसमा घाँटीमा केही अड्किरहेको, कपालको रौँ अड्किएको जस्तो अनुभव भइरहन्छ । खाना खाँदा, पानी खाँदा केही समस्या हुँदैन तर त्यत्तिकै बसिरहँदा थुक निल्दा केही आएर घाँटीमा बसेजस्तो हुन्छ।

हाम्रोमा उपचार गर्न आउने बिरामीहरू ‘मलाई के भो डाक्टरसाब, केही सानो कुरा अड्किएको छ घाँटीमा’ भन्दै आउनुहुन्छ । केही बिरामीहरू घाँटीको पछाडि भागमा केही डल्लो, गाँठो बसेको छ भन्दै आउनुहुन्छ ।

यो पनि पढ्नुहोस

ग्यास्ट्रिक मात्र नहुन सक्छ पेट दुखाइ

केही बिरामी घाँटी पोल्ने, पोलिरहने समस्या लिएर आउनुहुन्छ । यो कुरालाई नबुझेर कति बिरामी मलाई टन्सिल भइरहेको छ, टन्सिलको औषधि खाइरहेको छु तर पनि ठिक भएन भन्दै आउनुहुन्छ । धेरै चिल्लो, पिरो खाएको दिन या भोलिपल्ट घाँटी ख्याप्प समात्ने, पोल्ने अनुभव लिएर पनि हामीकहाँ आउनुहुन्छ । यसबारे थाहा नभएर घाँटीको क्यान्सर भयो कि वा कुनै ट्युमर पलायो कि भनेर शंका पनि बिरामीले गरिरहेका हुन्छन् ।

कसरी थाहा पत्ता लगाउने ?

यस्ता अनुभव लिएर आउने बिरामीहरूलाई सबैभन्दा पहिला हामीले जाँच गरेर घाँटीको ग्यास्ट्रिक हो कि होइन यकीन गर्छौँ । कसै-कसैलाई थाइराइडको समस्याले पनि यस्ता लक्षण देखिएको हुन्छ । कहिले कहीँ कुनै भिटामिनको कमीले पनि यस्तो हुनसक्छ ।

एउटा रगतबाट गर्ने परीक्षण हुन्छ, अर्को परीक्षण भनेको घाँटीको इन्डोस्कोपी गर्ने हो । यसमा नाकबाट एउटा सानो पाइप हालेर घाँटीसम्म हेर्छौँ । यसपछि घाँटीको ग्यास्ट्रिक हो कि होइन पत्ता लाग्छ ।

उपचार कसरी गर्ने ?

त्यसको पनि तह हुन्छ । कसलाई कुन तहको घाँटीको ग्यास्ट्रिक भएको छ, त्यो अनुसार उपचार गर्छौँ । उपचार भनेको विभिन्न खालका औषधि दिने नै हो । कतिपय औषधिहरू पेटको ग्यास्ट्रिक र घाँटीको ग्यास्ट्रिकमा एउटै खालका पनि हुन्छन् । फरक औषधिहरू पनि हुन्छन् ।

घरेलु उपचार के हुनसक्छ ?

एउटा त पेटको ग्यास्ट्रिकबाट बच्ने उपायहरू नै घाँटीको ग्यास्ट्रिकबाट जोगिने उपाय हुन् । तौल धेरै छ भने तौल घटाउने पर्छ । दुब्लोमा भन्दा मोटो मान्छेलाई यो समस्या बढी हुन्छ । नियमित व्यायाम गर्ने, चिल्लो, पिरो कम खाने गर्नुपर्छ । बेलुका सुत्नु भन्दा केही घण्टाअगाडि नै खाना खाने, खाना खानेबित्तिकै ओछ्यानमा नपल्टने यस्तो कुरामा ध्यान दिनुपर्छ।

यो पनि पढ्नुहोस

ग्यास्ट्रिक निको पार्ने घरेलु उपाय के छन् ?