पार्टीका अफ्ठ्यारा चिरेर अघि बढ्छौं : सन्तोष परियार

१८ माघ, काठमाडौं । राष्ट्रिय स्वतन्त्र पार्टीका प्रमुख सचेतक सन्तोष परियारले पार्टी जीवनमा आएका अफ्ठ्याराहरू चिरेर आगामी कदम अघि बढाउने बताएका छन् ।

शुक्रबार संसद् भवन परिसरमा सञ्चारकर्मीहरूसँग कुरा गर्दै उनले यस्तो बताएका हुन् । अभियान, क्रान्ति र देश निर्माणमा हिँड्ने क्रममा राजनीतिक पार्टीका जीवनमा यस किसिमका घटनाहरू हुने गरेको उनले जिकिर गरे ।

‘पार्टी जीवनमा आएका अफ्ठ्याराहरू चिरेर आगामी कदम अघि बढाउँछौँ । देश निर्माण गर्ने नयाँ पुस्ताको अभियान छ, यो निरन्तर अगाडि जान्छ,’ उनले भने ।

उनले देश निर्माण गर्ने नयाँ पुस्ताको अभियानलाई निरन्तर रुपमा अघि बढाउने बताए ।

‘एउटा अभियान, क्रान्ति र देश निर्माणमा हिँडिरहँदा एउटा राजनीतिक पार्टीका जीवनमा अनेक घटनाहरू हुन्छन् । हामीलाई थाहा छ । नेपालको राजनीतिक इतिहासमा अहिले स्थापित नेताहरू हुनुहुन्छ,’ परियारले भने, ‘उहाँहरूको बेलामा राणाका, पञ्चायतका बेलामा राज्यले उहाँहरुलाई पनि कति अन्याय गरेको थियो भन्नेकुरामा स्वयं अनुभवी हुनुहुन्छ ।’