जसपा नेपालको अध्यादेश कार्यदलले अर्थविद्सँग छलफल गर्दै, आजै प्रतिवेदन बुझाउने तयारी

२३ माघ, काठमाडौं । जनता समाजवादी पार्टी (जसपा) नेपालको अध्यादेश अध्ययन कार्यदलको बैठक आज पनि बस्दै छ । आज अर्थविदहरुसँग छलफल गर्ने कार्यदलका संयोजक राजकिशोर यादवले बताए । त्यसका लागि दिउँसो एक बजे बैठक बस्ने यादवले बताए ।

कार्यदलले मंगलबार सिंहदरबारमा विज्ञहरूसँग भूमि सम्बन्धी अध्यादेशबारे छलफल गरेको थियो । आज अर्थविदहरुसँग छलफल गरेर शीर्ष नेतृत्वलाई अध्यादेशबारे सुझाव प्रतिवेदन बुझाउने यादवले बताए ।

सरकारले संसद् नरहेका बेला ल्याएका ६ वटा अध्यादेशबारे पार्टीको धारणा बनाउन जसपा नेपालले राजकिशोर यादवको नेतृत्वमा कार्यदल गठन गरेको थियो । कार्यदलको सुझावको आधारमा अध्यादेश स्वीकार गर्ने कि नगर्ने भन्नेबारे जसपा नेपालले निर्णय लिने छ ।

अध्यादेशलाई संघीय संसद्का दुवै सदनले स्वीकृत गर्नुपर्ने संवैधानिक व्यवस्था छ । माघ २४ गते अर्थात् विहीबार बस्ने प्रतिनिधि सभा र राष्ट्रिय सभा बैठकमा सरकारले ल्याएका अध्यादेशहरु निर्णयार्थ पेस गर्ने तयारी छ ।

विपक्षी दलहरूले भने अध्यादेश अस्वीकृत गर्नका लागि विरोधको सूचना दर्ता गरेका छन् । प्रतिनिधि सभामा ५० वटा र राष्ट्रिय सभामा १६ वटा अस्वीकृतको सूचना दर्ता भएको छ ।

विपक्षमा रहेका दलहरू माओवादी केन्द्र, एकीकृत समाजवादी पार्टी लगायतले अध्यादेश अस्वीकृत गर्ने भनेर सूचना नै दर्ता गरिसक्दा समेत जसपा नेपालले निर्णय लिन सकेको छैन ।

प्रतिनिधि सभामा सत्तापक्षमा प्रष्ट बहुुमत छ । तर, राष्ट्रिय सभामा जसपा नेपालको मत निर्णायक छ । यसकारण जसपा नेपालले विज्ञहरुसँग परामर्श गरेर नै अध्यादेशबारे निर्णय लिन लागेको हो ।