चलचित्र विकास बोर्डले जनकपुरमा चलचित्र शिविर सञ्चालन गर्ने

चलचित्र विकास बोर्डले मधेस प्रदेशको जनकपुरमा फागुन १३, १४ र १५ गते चलचित्र शिविर सञ्चालन गर्ने भएको छ । मधेसमा चलचित्रबारे अभिरुची र चेतना जागृत गराई त्यहाँको बजारलाई विस्तार र सुदृढ बनाउने उद्देश्यले चलचित्र शिविर सञ्चालन गर्न लागिएको बोर्ड अध्यक्ष दिनेश डिसीले बताए।

मधेसमा नेपाली तथा मातृभाषा चलचित्रको अवस्था, बजार तथा दर्शक रुचीको अध्ययन/सर्वेक्षण पनि गरिने डिसीले जानकारी दिए । मधेशका युवा चलचित्रकर्मीलाई चलचित्र नीति, विधिबारे अभिमूखिकरण गर्ने, मधेसी समाजका मौलिक, नवीन, उत्कृष्ट कथाहरुको खोजी गर्ने, चलचित्र सम्बन्धी विषयक्षेत्रबारे बहस-विमर्श गर्ने उद्देश्यले पिन चलचित्र शिविर सञ्चालन गर्न लागिएको उनको भनाइ छ ।

‘चलचित्र शिविर कार्यक्रम नेपाली चलचित्र उद्योगमा दूरगामी प्रभाव पार्ने एक विशेष अभियान हो’ डिसीले भने, ‘यो चलचित्रीय कार्यक्रम मात्रै होइन, चलचित्रमार्फत देश जोड्ने एक महत्वपूर्ण सेतु हो।’ समभावको व्यवहार र संस्कृति विकास गरी सामाजिक-साँस्कृतिक सदभाव, सहिष्णुता र राष्ट्रिय एकतालाई सबल बनाउने एउटा सांस्कृतिक एकीकरणको एक प्रयास भएको डिसीले प्रस्ट्याए ।

बोर्डले चलचित्र शिविर अभियान सञ्चान गर्न बोर्ड सदस्य केएल बुढाथोकीलाई संयोजक तोकेको छ । संयोजक बुढाथोकीका अनुसार चलचित्र शिविरमा चलचित्र प्रदर्शन, पोष्टर तथा फोटो प्रदर्शनी, परामर्श सेवा, कार्यशाला, चलचित्र सम्बन्धी अभिमुखीकरण, अन्तर्क्रिया, संवाद, संगोष्ठी, चलचित्र सम्मेलन जस्ता कार्यक्रम हुनेछन्।