बाबुरामले ६८२ मत पाउँदा नेत्रको ७१, अनलाइन मत गन्न बाँकी

१ फागुन, काठमाडौं। नेपाल समाजवादी पार्टी (नयाँ शक्ति)को काठमाडौं भएको प्रथम महाधिवेशनमा मतगणना जारी छ ।

जारी मतगणनामा अध्यक्षका प्रत्यासी डा.बाबुराम भट्टराईले ६८२ मत पाउँदा नेत्र चापागाईंले ७१ मत पाएका छन् । निर्वाचन समितिका अनुसार विभिन्न देशबाट अनलाइन भोटिङ प्रणालीमार्फत खसेको मत गन्न बाँकी छ।

मतगणनामा सहभागी एक नेताका अनुसार प्रवासमा रहेको ५५ मतमध्ये केहीले मात्रै अनलाइनबाट मतदान गरेका थिए ।

महाधिवेशनमा १३२४ महाधिवेशन प्रतिनिधि सहभागी भएकोमा ८२२ मतमात्र खसेको थियो ।

जनजाति उपाध्यक्षमा टेकबहादुर बाठामगरले २९५ मत ल्याएर अग्रस्थानमा छन् । अन्य प्रत्यासीहरू दलबहादुर लिम्बुले १५२, रामबहादुर घलेले ११५ र अनुप सिंह सुवाले ९७ मत ल्याएका छन् ।

मधेशी उपाध्यक्षमा उमेश शाह ३५१ मत प्राप्त गर्दा चिनक कुर्मीले ३५१ मत प्राप्त गरेका छन् ।  महासचिवमा सोनाम सिंह स्याङ्तानले ३७४ मत ल्याउँदा जिएस गुरुङ (घमान सिंह) ले ३३६ मत प्राप्त गरेका छन् ।

त्यस्तै, महिला सचिवमा आशाकुमारी तामाङले २७२ मत ल्याउँदा सिर्जना रिजालले २६३ र सिर्जना सुवेदीले १५३ मत प्राप्त गरेकी छन् ।

खुला सचिवमा भरतराज दाहालले ३४१ मत प्राप्त गर्दा लक्ष्मण कार्की सन्देशले ३१५, छन्दबहादुर पन्थीले २४६ र दान बहादुर सहकारीले १९९ मत प्राप्त गरेका छन् ।

प्रवासबाट खसेको अनलाइन मत गणनापछि नेपाल प्रज्ञा प्रतिष्ठानको सिद्धिचरण हलमा आजै साँझ ५ बजे नवनिर्वाचित पदाधिकारी र केन्द्रीय सदस्यहरूको शपथ ग्रहण समारोह राखिएको नेसपा नयाँ शक्तिका नेता रुपनारायण श्रेष्ठले जानकारी दिए ।

महाधिवेशनमा पदाधिकारीसहित ९९ सदस्यीय केन्द्रीय समितिको ७९ पदका लागि मतदान भएको थियो भने २१ जना निर्विरोध निर्वाचित भइसकेका छन्।