२०८१ चैत ५ गते २१:११ 
५ चैत, काठमाडौं । नेपालकी सुमित्रा नगरकोटीले २०औं डब्लुएमएफ विश्व मुवाँथाईमा रजत पदक जितेकी छन् । नेपालले थप एक कास्य पनि जितेको नेपाल राष्ट्रिय मुवाँथाई संघका अध्यक्ष गणेशलाल कक्षपतिले जनाएका छन् ।
महिला ५७ केजीमा सुमित्राले इटालीकी मिचेला पिन्नालाई पराजित गरी सेमिफाइनलमा प्रवेश गरेकी थिइन् । फाइनलमा ब्राजिककी क्यामिला मोस्म्यानसँग चुकेपछि सुमित्रा रजतमा सीमित भइन् । सुमित्रा भरातमा गत वर्ष भएको इन्डो–नेपाल प्रोफेसनल फाइटकी स्वर्ण विजेता हुन् ।
कक्षपतिका अनुसार थाइल्यान्डको बैंककमा भएको प्रतियोगितामा परिका बतासले कास्य जितिन् । महिला ४८ केजीको सेमिफाइनलमा क्याथ्रिन स्टेभेन्ससँग पराजित हुँदै परिकाले कांस्यमा चित्त बुझाइन् । परिकाले विश्व मुवाँथाईको १९औं संस्करणमा भने स्वर्ण जितेकी थिइन् ।
नेपालबाट ६ खेलाडी सहभागी भएकोमा अकेश केसी, मिलन तामाङ, गुमन घर्ती मगर र आशिष तामाङ पदकविहीन बने । प्रशिक्षकमा राहुल मोक्तान रहेका छन् ।
सञ्जय राईले निर्णायकको भूमिका निर्वाह गरेका थिए । मार्च ९ देखि १८ तारिखसम्म भएको प्रतियोगितामा ३२ राष्ट्रका ३ सय ५२ खेलाडीले प्रतिस्पर्धा गरेको मुवाँथाई संघले जनाएको छ ।
प्रतिक्रिया 4