+
+
Shares

तीनकुनेमा राजावादीको आगजनी : २५ वर्षको मेहनत खरानी भयो

६/७ वर्षदेखि त्यहाँ हाम्रो कार्यालय थियो । आजको आगजनीले २५ वर्षदेखि संकलन गरेका कागजात, दस्तावेज र महत्वपूर्ण कितावहरू जलेर नष्ट भएको छ ।

राज सुवाल, कानुन व्यवसायी राज सुवाल, कानुन व्यवसायी
२०८१ चैत १५ गते २१:१०

१५ चैत, काठमाडौं । काठमाडौं तीनकुनेमा इन्द्रेणी सहकारीको कार्यालय छ । आज प्रदर्शनकारीहरूले आगजनी गरेको भवन पनि त्यही सहकारीको हो । हाम्रो सुवाल ल एसोसिएट्स र सेन्टर फर इन्टिलेक्चुअल प्रपर्टी नेपाल प्रा.लि.को कार्यालय पनि त्यही भवनमा थियो ।
भुईं तला समेत गरेर पाँच तले भवनमा चौथो तलामा हाम्रो कार्यालय थियो । कार्यालयमा म सहित अरु ३/४ जना कानुन व्यवसायी कार्यरत थियौं । आज म काम विशेषले भक्तपुरमा थिएँ, अरु साथीहरू कोही कता, कोही अदालतमा जानुभएको थियो ।

हामीले फ्ल्याट लिएर कार्यालय बनाएका थियौं । ६/७ वर्षदेखि त्यहाँ हाम्रो कार्यालय थियो । आजको आगजनीले २५ वर्षदेखि संकलन गरेका कागजात, दस्तावेज र महत्वपूर्ण कितावहरू जलेर नष्ट भएको छ ।

हामीलाई कानुन व्यवसायी राख्नुभएका मुद्दाका पक्षहरूले विश्वासमा परेर दिनुभएका आफ्ना महत्वपूर्ण कागजात र मिसिल जलेर नष्ट भएका छन्, जसको प्रति अन्यत्र कतै पनि थिएन । त्यसबाहेक कार्यालयमा रहेका कम्प्युटर, प्रिन्टर, लगायतका स्टेशनरी र अरु सामानहरू जलेका छन् ।

घटनापछि हामी कार्यालयमा गयौं । कागजात कामै नलाग्ने भएका छन् । धन्न अफिसमा नगद राखिएको थिएन । तर,  जति खर्च गरे पनि नपाइने कागजात नष्ट हुँदा निकै दुःख लागेको छ ।

हामीसँग के कति कागजात थियो ? कति फाइलहरू कता थिए ? केही मेसो पाउन सकिएको छैन । हाम्रो मनस्थिति निकै बिग्रेको छ । घटनास्थल पुग्दा हाम्रो कार्यालयमा धुवाँ पुत्ताइरहेको थियो, बारुणयन्त्रका साथीहरूलाई ‘लौन, पानी हालेर निभाइदिनुहोला’ भनेर आग्रह गरेँ, उहाँहरूले पानी नै छैन भनेर जवाफ दिनुभयो ।

घटनापछि म बानेश्वर प्रहरीमा पुगेँ । उहाँहरूले भित्र छिर्न दिनुभएन । मैले मेरो कार्यालय जलेर नष्ट भएको गुनासो गरेँ, त्यसपछि भोलि आएर रिपोर्ट गर्नुहोला भनेर पठाउनुभयो । अहिले त कर्फ्यु लागेको छ । कसरी जानु ? गएर नै पो के जोगिएको होला र ?
(अधिवक्ता राज सुवालसँगको कुराकानीमा आधारित)

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?