२०८१ चैत २६ गते ८:२२ 
२६ चैत, काठमाडौं । भारतमा जारी इन्डियन प्रिमियर लिग (आईपीएल) क्रिकेटमा आज दुई खेलहरू हुँदैछन् । आज दिउँसो र राति गरेर दुई खेल हुनेछन् ।
आजको पहिलो खेलमा कोलकाता नाइट राइडर्स र लखनउ सुपर जायन्ट्स खेल्ने छन् । खेल दिउँसो पौने ४ बजेदेखि कोलकातास्थित इडेन गार्डेन्समा सुरु हुनेछ ।
यस खेल आइतबारका लागि तय रहेको भएपनि राम नवमीका कारण मैदानमा खटिने प्रहरीको अभाव हुनसक्ने भन्दै आजका लागि सारिएको हो ।
कोलकाता र लखनउ दुवैले ४ खेलमा २ जित र २ हारको नतिजा निकालेका छन् । यी दुवै टिमको हालसम्मको फर्म पनि हार, जित, हार, जित छ ।
४ खेलमा ४ अंक जोडेका यी दुई टोलीहरू अंकतालिकामा बीच भागमा छन् । कोलकाता पाँचौं र लखनउ छैटौं स्थानमा छन् र फरक केवल नेटरनरेटको छ । आजको खेल जित्ने टिमले ५ खेलमा तेस्रो जित निकाल्ने छ ।
आजको अर्को खेलमा पञ्जाब किङ्स र चेन्नई सुपर किङ्स खेल्दै छन् । खेल पञ्जाबको मुल्लानपुरमा बेलुका पौने ८ बजेदेखि सुरु हुनेछ ।
पञ्जाबले ३ खेलमा २ जित निकालेको छ भने चेन्नईले ४ खेलमा १ जित मात्र निकाल्न सकेको छ । सुरुवाती दुई खेल जितेको पञ्जाब तेस्रो खेलमा पराजित भयो ।
चेन्नईले सुरुवाती खेल जितेपछि लगातार ३ खेल हारेको छ । अंकतालिकामा पञ्जाब ३ खेलमा ४ अंक जोडेर चौथो स्थानमा छ भने चेन्नई २ अंकसहित नवौं स्थानमा छ ।
प्रतिक्रिया 4