राजीनामा फिर्ताको प्रस्ताव लिएर पोखरा पुगे त्रिविका रेक्टर र रजिस्ट्रार, के भन्छन् बराल ?

२६ चैत, काठमाडौं । त्रिभुवन विश्वविद्यालयको उपकुलपति पदबाट राजीनामा दिएका प्रा.डा. केसरजंग बराललाई राजीनामा फिर्ता गरेर काममा फर्किन रेक्टर खड्ग केसी र रजिस्ट्रार केदारप्रसाद रिजालले आग्रह गरेका छन् ।

१० दिनअघि राजीनामा दिएका बराललाई रेक्टर केसी र रजिस्ट्रार रिजालले पोखरा नै पुगेर राजीनामा फिर्ता गर्न आग्रह गरेका हुन् । ‘रेक्टर र रजिस्ट्रार सर बराल सरको राजीनामा फिर्ता गराउन पोखरा नै जानु भएको हो’, त्रिविका एक अधिकारीले भने ।

रेक्टर र रजिस्ट्रारले प्रधानमन्त्री एंव कुलपति केपी ओलीसँग छलफल गर्न बराललाई आग्रह पनि गरेका छन् ।

बराललाई कममा फर्किने वातावरण बनाउन शिक्षा, विज्ञान तथा प्रविधिमन्त्री विद्या भट्टराईलाई पनि सहजीकरण गर्न अनुरोध गरेका छन् ।

राजीनामा दिएका बरालले पनि रेक्टर र रजिस्ट्रारले काममा फर्किने प्रस्ताव गरेको स्वीकार गरे । ‘उहाँहरू आउनु भएको हो । थप कुरा पछि गरौंला’, बरालले भने ।

रेक्टर केसीले पनि आफूहरू मिलेर काम गर्न चाहेको बताए । ‘उहाँ (केसरजंग) सरको नेतृत्वमा हामी आएका हौं । विश्वविद्यालयमा समस्या आइरहन्छ । मिलेर काम गरौं भन्ने छ’, केसीले भने । तर, बरालले गाडी, पीएसओ, ल्यापटप फिर्ता गरेर पोखरा गएका छन् ।

राजीनामा दिइसकेकाले उपकुलपतिमा बराललाई फर्काउने वा राजीनामा स्वीकृत गर्ने भन्ने निर्णय प्रधानमन्त्री एवं कुलपति केपी ओलीले गर्नेछन् ।

स्रोतका अनुसार आज साँझसम्म प्रधानमन्त्री ओलीले निर्णय लिने बताइएको छ ।

गत २०८० फागुन १० मा तत्कालीन प्रधानमन्त्री एवं त्रिविका कुलपति पुष्पकमल दाहाल प्रचण्डले उनलाई उपकुलपतिमा नियुक्त गरेका थिए । १३ महिनामा नै उनले राजीनामा दिएका हुन् । बरालले राजीनामाको कारण स्वास्थ्यलाई देखाएका छन् ।

त्रिविका प्राध्यापकहरू करार शिक्षक-कर्मचारीलाई स्थायी र आंशिकलाई करार बनाउन दबाब आएपछि राजीनामा दिएको बताउँछन् । बरालले कुलपतिको निर्णयपछि मात्र आफू बोल्ने बताउँदै आएका छन् ।