एनएसएलमा आज : झापा र पोखरा तथा बुटवल लुम्बिनी र ललितपुर सिटी भिड्दै

३० चैत, काठमाडौ । नेपाल सुपर लिग (एनएसएल) २०२५ मा आज सुपर स्याटर्डे अन्तर्गत दुई खेल हुँदैछ । एनएसएलमा यो दोस्रो डबल हेडर डे हो ।

आज झापा एफसी र पोखरा थण्डर्स तथा बुटवल लुम्बिनी र ललितपुर सिटी एफसीबीच प्रतिस्पर्धा हुँदैछ । दुवै खेल त्रिपुरेश्वरस्थित दशरथ रंगशालमा हुनेछ ।

पोखरा र झापाबीचको पहिलो खेल दिउँसो २ बजे सुरु हुनेछ । यसअघि दिउँसोको खेल साढे २ मा भएपनि दुई खेलबीचको ग्याप मिलाउनका लागि दिउँसो हुने खेलको समय अघि सारिएको आयोजकले जनाएको छ ।

टेबलको बटम हाफमा रहेका पोखरा र झापा आजको खेल जित्दै शीर्ष चार भित्र इन्ट्री मार्ने दाउमा छन् । तर दुवै टिमले यस सिजन एकरुपको प्रदर्शन गर्न सकेका छैनन् ।

चार खेलबाट ४ अंकसहित पोखरा पाँचौ स्थानमा छ भने ३ खेल मात्र खेलेको झापा ३ अंकसहित छैटौं स्थानमा छ । झापाले अपराजित यात्रा कायम राखेपनि खेल जित्न भने सकेको छैन । झापाले यस सिजन खेलेको सबै खेल बराबरी गरेको छ र अझै पहिलो जितको खोजीमा छ ।

पोखराले भने सुरुवाती दुई खेलमा चितवन र ललितपुर सिटीसँग हार व्यहवरेपनि त्यसपछि काठमाडौंलाई हराएर पहिलो जित निकालेको थियो तर पछिल्लो खेलमा धनगढीसँग बराबरी खेलेको थियो ।

उता झापाले बुटवल लुम्बिनी र काठमाडौं रेजर्ससँग गोलरहित बराबरी खेल्दा चितवनसँग १-१ को बराबरी खेलेको थियो ।

ललितपुरलाई प्लेअफ पुग्ने अवसर

यसैगरी साँझ ६ बजे हुने खेलमा पूछारको बुटवल लुम्बिनी र दोस्रो स्थानको ललितपुर सिटी एफसीबीच प्रतिस्पर्धा हुनेछ ।

जारी लिगमा ललितपुर अपराजित तीन टिम मध्ये एक हो र उत्कृष्ट प्रदर्शन गरिरहेको टिम हो । अर्कोतर्फ एक खेल पनि जित्न नसकेको अर्को टिम हो बुटवल लुम्बिनी ।

त्यसैले ललितपुरलाई यस खेल जित्दै प्लेअफमा पुग्ने अवसर समेत हुनेछ । यदी बुटवललाई हराएमा ललितपुर सिटी एक खेल अघि नै प्लेअफ पुग्नेछ ।

साविक विजेता ललितपुर चार खेलमा अपराजित छ र ८ अंक जोडेर दोस्रोमा छ । साविक उपविजेता धनगढी एफसीको पनि समान ८ अंक नै छ तर गोलअन्तरमा धनगढी अघि छ ।

दुई दिनअघि मात्रै एफसी चितवनलाई पराजित गरेको ललितपुर उत्कृष्ट लयमा छ । अहिलेसम्म जितविहिन रहेको बुटवलका लागि ललितपुर सिटी ठूलो चुनौती हुनेछ ।